Katar áýe jolaýshylaryna salyq engizedi

ASTANA. QazAqparat - Katar bıligi Dohadaǵy eń iri áýejaı - Hamad International Airport arqyly ushatyn jolaýshylarǵa salyq engizedi, dep habarlady Arabian Business basylymy.

Katar áýe jolaýshylaryna salyq engizedi

35 katar rıaly (9,6 dollar) kólemindegi salyq tranzıttik jáne charterlik reısterdi qosqanda barlyq jolaýshydan alynady. Jergilikti týrıstik operatorlarǵa jiberilgen nusqaýǵa sáıkes, salyq seısenbiden bastap kúshine enedi jáne bıylǵy 1 jeltoqsannan keıin ushatyn jolaýshylarǵa qoldanyla bastaıdy.

Álem elderiniń kópshiligine qaraǵanda, Parsy shyǵanaǵyndaǵy el áýejaıyn paıdalanǵany úshin eshqandaı salyq engizbegen edi, dep jazdy basylym. Buǵan deıin eldegi barlyq áýejaıǵa salyq engizý týraly BAÁ bıligi málimdegen edi.

Munaıdyń álemdik baǵasynyń tómendeýine baılanysty, 15 jylda alǵash ret Katarda memlekettik bıýdjet tapshylyǵy bolýy múmkin. Bıliktiń boljaýynsha, tapshylyq kólemi 10 mıllard dollardan asady.