Katar arab memleketterimen baılanystyń úzilgendigine qatysty ún qatty
ÁBÝ-DABI. QazAqparat - Katar memleketiniń Syrtqy ister mınıstri sheıh Mohammed bın Abdýlrahman Ál Tanı Saýd Arabııasy, Bahreın, BAÁ jáne Egıpet elderi Katarmen baılanystyń úzgendigine ókinish bildirdi.
Onyń aıtýynsha, bul - jaǵdaıdyń shegine jete ýshyǵýyn kórsetedi, al osyndaı jaǵdaıda Katardyń strategııalyq tańdaýy kez kelgen daǵdarysty dıalog arqyly sheshý bolyp qala beredi.
«Shynymdy aıtsam, oqıǵanyń nelikten osy baǵytta oryn alǵanyn bilmeımiz. Daǵdarystyń shynaıy sebepteri bar ma nemese bizge beımálim dúnıeler negiz boldy ma, ol jaǵy da belgisiz», - dep keltiredi sheıh Mohammed bın Abdýlrahman Ál-Tanıdiń sózin Dohadaǵy Ál-Jazıra telearnasy.
Katardyń syrtqy ister mınıstriniń sózine qaraǵanda, eger shynaıy sebepter bolsa «mundaı ýshyǵýǵa negiz bolmas edi jáne Dohaǵa qatysty medıafalsıfıkatsııaǵa oryn joq edi».
«Eger (dıplomatııalyq qarym-qatynastyń úzilýine) shynaıy sebepter bolsa, ol Parsy shyǵanaǵyndaǵy Arab memleketteriniń yntymaqtastyq keńesine qatysýshy-kóshbasshylardyń kezdesýinde talqyǵa salynatyn edi. Alaıda, buryn-sońdy, sonyń ishinde Er-Rııadtaǵy amerıkalyq-ıslam sammıtinde de bul másele múldem aıtylǵan joq», - dedi katarlyq mınıstr.
