Qatar AQSh pen Iran kelissózderiniń sátsiz aıaqtalǵanyn joqqa shyǵardy
ASTANA. KAZINFORM — 7 qarashada Qatar bıligi áleýmettik jelilerde eldiń premer-mınıstri men syrtqy ister mınıstri AQSh pen Iran arasyndaǵy kelissózderdiń sátsiz aıaqtalǵany týraly málimdeme jasady degen aqparatty joqqa shyǵardy, dep TASS agenttigi jazdy.
Qatardyń Halyqaralyq medıa keńsesi osyǵan qatysty resmı málimdeme jarııalady.
— Qatar premer-mınıstri ári Syrtqy ister mınıstri AQSh pen Iran kelisimge kele almady dep málimdedi degen áleýmettik jelilerde taraǵan aqparat shyndyqqa janaspaıdy, — delingen málimdemede.
Medıa keńseniń aıtýynsha, sheıh Muhammed ben Abdel Rahman Ál Tanıdiń sózderi soǵystyń jalǵasýy men aımaqtaǵy turaqsyzdyqtan paıda kórip otyrǵan kúshter tarapynan ádeıi burmalanǵan. Sondaı-aq jalǵan akkaýnttar dıplomatııalyq kúsh-jigerge kedergi keltirip, aımaqtaǵy ahýaldy odan ári ýshyqtyrý úshin jalǵan aqparatty jappaı taratyp jatqany aıtyldy. Vedomstvo mundaı áreketterdi asa jaýapsyzdyq dep baǵalady.
Málimdemede Premer-mınıstrdiń shyn máninde eki tarap ta kelisimge kelý baǵytyndaǵy jumysty jalǵastyryp jatqanyn rastaǵany aıtylǵan. Qatarlyq deldaldar kelissózderdi ilgeriletý úshin Vashıngton jáne Tegeranmen tyǵyz baılanysta jumys istep jatyr.
Qatar AQSh pen Iran arasyndaǵy janama kelissózderge araaǵaıyndyq jasap otyrǵan negizgi taraptardyń biri. 2 qarashada Reuters agenttigi Qatar delegatsııasy Iran Syrtqy ister mınıstri Abbas Arakchımen jasalýy múmkin kelisimdi talqylaý úshin Tegeranǵa barǵanyn habarlady. Kelesi kúni Qatar Syrtqy ister mınıstrliginiń resmı ókili Madjıd ben Muhammed ál-Ansarı delegatsııanyń Dohaǵa oralǵanyn rastady. Vedomstvonyń habarlaýynsha, Vashıngton men Tegeran kelissózderdi jalǵastyrýǵa nıetti jáne qaqtyǵysty retteý jónindegi Qatardyń usynystaryn qarastyryp jatyr.
6 qarashada Qatar ámiri sheıh Tamım ben Hamad Ál Tanı AQSh Prezıdenti Donald Tramppen Taıaý Shyǵystaǵy ahýaldy turaqtandyrýǵa baǵyttalǵan dıplomatııalyq sharalardy talqylady.
Buǵan deıin Donald Tramp AQSh pen Iran arasyndaǵy kelissóz jalǵasyp jatqanyn málimdegenin habarlaǵan bolatyzbyz.
