Qatar AQSh pen Iran arasyndaǵy kelissózderde ilgerileý baryn aıtty
ASTANA. KAZINFORM — Qatar AQSh pen Iran arasyndaǵy qaqtyǵysty retteý jónindegi dıplomatııalyq áreketterde ilgerileýshilik baryn málimdedi. Bul týraly eldiń Syrtqy ister mınıstrligi Qatar premer-mınıstriniń Aq úıde AQSh prezıdenti Donald Tramppen kezdesýinen keıin habarlady, dep jazady Kazinform agenttigi Euronews-ke silteme jasap.
Qatar premer-mınıstri ári syrtqy ister mınıstri sheıh Muhammed bın Abdýlrahman Ál Tanı 9 qarashada Vashıngtonda AQSh prezıdenti Donald Tramppen kelissóz ótkizdi.
Qatar Syrtqy ister mınıstrliginiń BAQ jáne kommýnıkatsııalar departamentiniń dırektory Ibragım bın Sultan Ál Hashımıdiń aıtýynsha, kezdesý jaqsy atmosferada ótip, kelissóz úderisin ilgeriletýge baǵyttalǵan.
— Ázirshe kelisimge qol jetkizýge qanshalyqty jaqyn nemese alys ekenimizdi aıta almaımyz. Degenmen araaǵaıyndyq áreketter jalǵasyp jatyr. Eki tarap ta máseleni dıplomatııalyq jolmen sheshýge qatysty oń ustanym bildirip otyr, — dedi Qatar syrtqy saıası vedomstvosynyń ókili.
Ol Qatar premer-mınıstriniń Vashıngtonǵa saparyna deıin el ókilderi Tegeranda kelissózder júrgizip, aımaqtaǵy basqa memleketterdiń úkimetterimen de konsýltatsııalar ótkizgenin aıtty.
Al Donald Tramp Parsy shyǵanaǵy elderi, sonyń ishinde Qatar men Saýd Arabııasy, Iranǵa jańa soqqy jasamaýǵa úndegenin málimdedi. AQSh prezıdenti ázirshe jańa shabýyldar jasamaýǵa keliskenin, biraq teńiz blokadasyn saqtap qalatynyn aıtty.
Óz kezeginde Tegeran AQSh-tyń soqqylaryn toqtatý, Ormýz buǵazyndaǵy Iran porttarynyń blokadasyn alyp tastaý jáne sanktsııalardyń bir bóligin joıý shartymen eki kún ishinde kelissózderdi qaıta bastaýǵa usynys jasady. Al Irannyń ıadrolyq baǵdarlamasyna qatysty máseleni keıinirek talqylaý josparlanyp otyr.
Qatar Syrtqy ister mınıstrliginiń ókili Parsy shyǵanaǵy elderinen munaı men suıytylǵan tabıǵı gaz eksporttaýdyń negizgi baǵyttarynyń biri sanalatyn Ormýz buǵazy arqyly keme qatynasyn múmkindiginshe tezirek qalpyna keltirý qajet ekenin de atap ótti.
Taraptardan oń sıpattaǵy málimdemeler bolǵanymen, Vashıngton men Tegerannyń kelisimge kelý merzimi ázirshe belgisiz.
Eske salaıyq, buǵan deıin AQSh prezıdenti Donald Tramp Iranǵa qatysty áskerı qysymdy saqtaýǵa jáne qajet bolǵan jaǵdaıda soqqylardy qaıta bastaýǵa daıyn ekenin málimdegen edi.
