Qatar 2036 jylǵy Olımpıadany ótkizýge ótinim berdi
ASTANA. KAZINFORM – Katar 2036 jylǵy Jazǵy Olımpıada jáne Paralımpıada oıyndaryn ótkizýge resmı túrde ótinim berdi. Bul týraly ótinimniń Halyqaralyq Olımpıada komıtetine (HOK) jiberilgenin rastaǵan Katar Olımpıadalyq komıssııasy málim etti, dep habarlaıdy Anadolu Ajansı.
Málimdemede Qatardyń zamanaýı sporttyq ınfraqurylym, halyqaralyq uıymdastyrý deńgeıine jáne qajetti tájirıbege ıe ekeni atap ótildi. Olımpıada komıtetiniń tóraǵasy jáne ótinim berý komıssııasynyń tóraǵasy sheıh Djývan bın Hamad Ál Tanıdiń atap ótýinshe, Oıyndardy ótkizýge degen umtylys sporttyń halyqtar arasyndaǵy ózara túsinistik pen beıbitshilikti ilgeriletý alańy retindegi ulttyq kózqarasty tanytady.
Qatar premer-mınıstri jáne syrtqy ister mınıstri Muhammed bın Abdýrrahman Ál Tanı eldiń ótinimi – Oıyndardy ótkizýge umtylý ǵana emes, Qatarda qabyldanǵan «beıbitshilik úshin sport» fılosofııasynyń kórinisi ekenin atap ótti. Ol sonymen qatar Qatardyń aldyńǵy qatarly qaýipsizdik tehnologııalarymen qamtamasyz etilgen ozyq ınfraqurylymyna toqtaldy.
Atap ótilgendeı, Olımpıadany ótkizýge ótinim berý eldiń iri halyqaralyq jarystardy, atap aıtqanda, qaýipsizdik, jaılylyq jáne uıymdastyrý deńgeıi boıynsha joǵary baǵa alǵan 2022 jylǵy fýtboldan álem chempıonatyn uıymdastyrýdaǵy tabysty tájirıbesiniń qısyndy jalǵasy.
Tańdalǵan jaǵdaıda Qatar Taıaý Shyǵys pen Parsy shyǵanaǵy aımaǵyndaǵy Olımpıada oıyndaryn ótkizetin alǵashqy memleket bolady.
Qatar buǵan deıin birqatar iri jarystardy ótkizgen bolatyn, sonyń ishinde 2006 jylǵy Azııa oıyndary, 2015 jylǵy gandboldan álem chempıonaty, 2019 jylǵy jeńil atletıkadan álem chempıonaty, 2024 jylǵy sý sporty boıynsha álem chempıonaty bar, sonymen qatar 2025 jylǵy ústel tennısinen álem chempıonatyn, 2025 jylǵy álem chempıonatyn, 2026 jylǵy oq atýdan álem chempıonatyn, 2027 jyly basketboldan álem chempıonatyn jáne 2030 jylǵy Azııa oıyndaryn qabyldaıdy.
Buǵan deıin Los-Andjeleste ótetin 2028 jylǵy Olımpıada oıyndarynyń kestesi resmı Olımpıada saıtynda jarııa etilgenin habarlaǵan bolatynbyz.