Qatar-2022: Ýrýgvaı men Ońtústik Koreıa teń tústi

ASTANA. QazAqparat - Qatarda ótip jatqan fýtboldan 2022 jylǵy álem chempıonatynyń besinshi oıyn kúninde H tobynda Ýrýgvaı men Ońtústik Koreıa teń tústi, dep habarlaıdy QazAqparat tilshisi.

Ońtústik Amerıka qurlyǵynan kelgen Ýrýgvaı quramasy 1930, 1950 jyldarda jeńimpaz tuǵyryna kóterilgen edi.

Sodan bergi ýaqytta atalǵan jetistigin qaıtalaı alǵan joq. Tipti, úzdik úshtikten de kóringen emes.

Tek 1954, 1970, 2010 jyldarda tórtinshi oryndy mise tutty. Aıtýly alamanda bıyl 13 márte baq synaǵanyna qaramastan ázirge qol jetken tabysy osy ǵana bolyp tur.

Búgingi kezdesý barysynda ýrýgvaılyq fýtbolshylar tizgindi óz qolyna alýǵa tyrysty.

Dese de, olardyń qarqyndy oıynyna koreılik qurama laıyqty tótep berdi.

Qorǵanys shebinde saýatty oınap, Ońtústik Amerıka qurlyǵy ókilderiniń esep ashýyna múmkindik bergen joq.

Oıyn jaǵdaıy ekinshi kezeńde de dál osyǵan uqsas jaǵdaıda órbidi. Ýrýgvaılyq fýtbolshylar qarqyndy arttyra tústi. Alaıda, olarǵa dáldik jetispeı jatty.

Kezdesýde qos qurama 0:0 esebine qanaǵat bildirdi.

Sondaı-aq, atalǵan toptaǵy Portýgalııa men Gana oıyny 22.00-de «Qazaqstan» telearnasynan tikeleı efırde kórsetiledi.

Al G tobynda búgin Shveıtsarııa Kamerýnnan basym tústi.

Bul topta Brazılııa men Serbııa kezdesýin elorda ýaqytymen 01:00-de «Qazaqstan» jáne «Qazsport» telearnalarynan tikeleı efırde tamashalaýǵa bolady.

Foto: REUTERS / Kai Pfaffenbach