Qatar-2022: Portýgalııa jeńilgennen keıin Ronaldý kóz jasyna erik berdi

ASTANA. QazAqparat – Qatarda fýtboldan ótip jatqan álem chempıonatynyń shırek fınalynda Marokkodan jeńilgennen keıin Portýgalııa quramasynyń kapıtany Krıshtıaný Ronaldý kóz jasyn jasyra almady, dep habarlaıdy QazAqparat tilshisi.

Tóreshi ysqyryǵy estilisimen-aq K.Ronaldý minbe astyndaǵy orynǵa bet aldy.

Ataqty oıynshynyń mundaı kóńil-kúıge erik berýi túsinikti edi. Qazirgi kezde 37 jastaǵy Ronaldýdyń kelesi álem chempıonatyna qatysýy neǵaıbyl bolatyn.

Marokkomen matchta shabýylshy 51-mınýtta alańǵa shyqty. Sóıtip ol Portýgalııa quramasy sapyndaǵy 196-ynshy oıynyn ótkizdi. Bul kórsetkish jóninen K.Ronaldý Kýveıt oıynshysy Bader Al-Mýtavamen teńesti.

Bes dúrkin «Altyn dop» ıegeri atanǵan Ronaldý osynshama ret Chempıondar lıgasynyń jeńimpazy boldy. Eýropa jáne Ulttar lıgasynyń chempıony degen ataǵy taǵy bar. Ol – ulttyq quramalar, Eýropa birinshiligi, Chempıondar lıgasy, klýbtyq álem chempıonaty jáne «Real» klýby (Madrıd) tarıhyndaǵy úzdik surmergen. Oǵan tek álem chempıony degen ataq jetpeıtin edi.

Eske sala keteıik, budan buryn Nıderland quramasyn joldan taıdyrǵan Argentınanyń jartylaı fınalǵa shyqqanyn jazǵan bolatynbyz.

Sondaı-aq amerıkalyq jýrnalıst Nıderland-Argentına matchy kezinde kóz jumdy.

Brazılııada fýtbol jankúıerleri tóbelesip, 1 adam kóz jumdy.

Marokko Portýgalııany jeńip, ½ fınalǵa joldama aldy.