Qatar-2022: Portýgalııa men Ońtústik Koreıa pleı-off kezeńine shyqty

ASTANA. QazAqparat – Qatarda fýtboldan ótip jatqan álem chempıonatynda H tobynda Ońtústik Koreıa men Portýgalııa quramalary jasyl alańǵa shyqty, dep habarlaıdy QazAqparat tilshisi.

Bul topta Ganany 3:2, Ýrýgvaıdy 2:0 esebimen tize búktirgen Portýgalııa eki týrdan keıin-aq pleı-off joldamasyna ıe bolǵan edi. Al bir ǵana upaıy bar ońtústikkoreıalyqtarǵa jeńis aýadaı qajet-ti.

Óz tobynda birinshi oryn alý úshin Fernandý Santýsh shákirtterine teń oıyn jetkilikti bolatyn. Al jeńilip qalǵan jaǵdaıda qatar ótip jatqan matchta Gana Ýrýgvaıdy utyp ketse, onda dop aıyrmasyn esepteýge týra keledi. Sondyqtan portýgalııalyqtardyń oǵan jetkizbeýge tyrysatyny túsinikti edi.

Portýgalııa quramasy matchty sátti bastap, 5-mınýtta-aq esep ashty. Pepe alystan oń qanatqa asyrǵan dopty Dıogý Dalot qabyldap alyp, Rıkardý Ortaǵa jyljytty. Ol óz múmkindigin múlt jibergen joq – 1:0.

Ońtústikkoreıalyqtar da qarap qalmaı, 27-mınýtta Kım En Gvon tarazy basyn teńestirdi – 1:1.

Ekinshi kezeńde 52-mınýtta Krıshtıaný Ronaldý qaqpashymen jekedara shyǵyp, dopty durys soǵa almady. Esesine argentınalyq tóreshi Fakýndo Telo qosymsha 6 mınýt qosqan ýaqytta Ońtústik Koreıa kapıtany Son Hyn Mınnan pas alǵan Hvan Hı Chan jeńis golyn soǵyp ketti – 2:1.

Osylaısha, ońtústikkoreıalyqtardan jeńilip qalǵanyna qaramastan, Portýgalııa óz tobynan birinshi orynmen pleı-ofqa shyqty. Endi eýropalyqtar 1/8 fınalda G tobynda ekinshi oryn alǵan quramamen oınaıdy. Ol topta Brazılııa pleı-ofqa kúni buryn shyqsa, ekinshi joldama máselesi 3 jeltoqsanǵa qaraǵan túnde ótetin sońǵy, úshinshi týrda sheshiledi.

Sondaı-aq pleı-ofqa shyqqan Ońtústik Koreıa 1/8 fınalda G tobynda jeńimpaz atanǵan quramamen kezdesedi.

Eske sala keteıik, budan buryn Belgııamen teń túsken Horvatııanyń jarysty jalǵastyratynyn jazǵan bolatynbyz.

Sondaı-aq Germanııa quramasy pleı-off kezeńine shyǵa almaı qaldy.