Qatar-2022: Portýgalııa Frantsııa men Brazılııadan keıin pleı-off kezeńine shyqty
Bul topta birinshi týrda portýgalııalyqtar tartysty matchta Ganany 3:2 esebimen utsa, Ýrýgvaı Ońtústik Koreıamen teń oınaǵan edi.
Ekinshi týrda Gana ońtústikkoreıalyqtardy 3:2 esebimen tize búktirip, Portýgalııany qýyp jetti. Degenmen portýgalııalyqtar Ýrýgaıdy jeńse, pleı-ofqa shyǵatyn edi.
Osydan tórt jyl buryn Reseıde ótken chempıonatta 1/8 fınalda qos komanda kezdesip, ýrýgvaılyqtar 2:1 esebimen utyp ketken bolatyn. Sonda Edınson Kavanı qos goldyń avtory atansa, Portýgalııadan Pepe mergendigimen kózge túsken edi. Sol oıynda Krıshtıaný Ronaldý gol soǵa almaı, qapy ketken-di.
Bul joly birinshi taımda bastapqyda portýgalııalyqtar dopqa kóbirek ıelik etkenimen, eshteńe tyndyra almady. Esesine 32-mınýtta ýrýgvaılyq Rodrıgo Bentankýr qos qorǵaýshynyń ortasynan sytylyp shyǵyp, qaqpashy Dıogý Koshtamen betpe-bet keldi. Tek erte umtylyp úlgergen D.Koshta komandasyn goldan aman alyp qaldy.
Ekinshi kezeńde 54-mınýtta sol qaptaldan Brýný Fernandeshtiń Krıshtıaný Ronaldýǵa qaraı asyrǵan doby qaqpadan bir shyqty – 1:0.
Budan keıin ýrýgvaılyqtar tarazy basyn teńestirý úshin baryn saldy. Shabýylshylar Lýıs Sýares pen Maksı Gomes alańǵa tyńnan qosyldy. Sol boıda 75-mınýtta Fakýndo Pelıstrıden pas alǵan M.Gomes qaqyrata soqqan dop qaqpa jaqtaýynan keri qaıtty.
Matchtyń aıaqtalýyna sanaýly mınýttar qalǵanda, Brýný Fernandesh alǵa umtylǵanda, ýrýgvaılyq qorǵaýshy Hose Marııa Hımenes qolmen oınady. 93-mınýtta B.Fernandesh 11 metrlik penaltıden múlt ketken joq – 2:0. Budan soń da portýgalııalyqtardyń esepti ulǵaıtyndaı múmkindikteri boldy.
Osylaısha, H tobynda Ýrýgvaıdy 2:0 esebimen tize búktirgen Portýgalııa alty upaı jınap, 1/8 fınalǵa joldama aldy. Ganada úsh, Ýrýgvaı men Ońtústik Koreıada bir-birden upaı bar. 2 jeltoqsan kúni Gana – Ýrýgvaı, Ońtústik Koreıa – Portýgalııa quramalary ózara kezdesedi.
Buǵan deıin Frantsııa men Brazılııa quramalary merziminen buryn pleı-off kezeńine shyqqan edi.
Sonymen, Qatardaǵy dúnıejúzilik dodada ekinshi týr oıyndary máresine jetti.
Eske sala keteıik, budan buryn Horvatııanyń Kanadany iri eseppen utqanyn jazǵan bolatynbyz.
Sondaı-aq Ispanııa men Germanııa quramalary teń tarqasty.
Kamerýn men Serbııa teń tústi.
Shveıtsarııany utqan Brazılııa pleı-off kezeńine joldama aldy.
Bir matchta eki gol soqqan ońtústikkoreıalyq fýtbolshy rekord ornatty.
Foto: sports.kz
