Qatar-2022: Polsha quramasy Saýd Arabııasynan basym tústi
Alǵashqy týrda Polsha Meksıkamen 0:0 esebimen teń oınasa, Saýd Arabııasy Argentınany 2:1 esebimen súrindirdi.
Búgingi kezdesýde eki quramanyń da jeńiske jetýge bar kúshin salatyny anyq edi. Polsha basym tússe, týrnır kestesindegi jaǵdaıyn jaqsartyp alatyn edi. Al Saýd Arabııasy taǵy bir márte úsh upaıdy oljalaǵan jaǵdaıda pleı-off satysyna beriletin joldamany erte qaltaǵa basyp úlgeretin.
Oıynnyń bastapqy kezeńinde Saýd Arabııasy belsendi qımylymen kózge tústi. Dese de esepti alǵashqy bolyp polshalyq qurama ashty. Kezdesýdiń 39-mınýtynda polshalyq Robert Levandovskıdiń bergen pasyn áriptesi Petr Zelınskı qaqpa torynda týlatty.
Al 45-mınýtta Saýd Arabııasy quramasy sapynan Salem Al Devsarı penaltıden múlt ketti.
Ekinshi kezeńde quramalar shabýylǵa kóbirek kóńil bóldi. Esepti ózgertetin birneshe múmkindik bolǵan edi. Olar dittegen mejesine jetpeı jatty. Saýd Arabııasy tarazy basyn teńestirýge umtylǵan edi. Esesine óziniń qaqpasyna gol jiberip aldy. Qorǵaýshylardyń qateligin sheber paıdalanǵan Robert Levandovskı óz quramasynyń basymdyǵyn arttyrdy.
Osylaısha, Polsha quramasy qarsylasynan 2:0 esebimen basym tústi.
Atalǵan jeńisten keıin polshalyqtar tórt upaımen kósh basyna shyqty.
Sondaı-aq, Argentına men Meksıka kezdesýi «Qazaqstan», «Qazsport» telearnalarynan elorda ýaqytymen 01:00-de tikeleı efırde kórsetiledi.
Qazirge deıin D tobynda ekinshi týrda Aýstralııa Týnısti tize búktirdi.
Bul toptaǵy Frantsııa men Danııa kezdesýi elorda ýaqytymen 22:00-de «Qazaqstan» telearnasynan tikeleı efırde kórsetiledi.
Foto: Getty Images
