Qatar-2022: Nıderland quramasyn joldan taıdyrǵan Argentına jartylaı fınalǵa shyqty

ASTANA. QazAqparat – Qatarda fýtboldan ótip jatqan álem chempıonatynda Nıderland pen Argentına quramalary jartylaı fınaldyń joldamasyn sarapqa saldy, dep habarlaıdy QazAqparat tilshisi.

Argentınanyń osyǵan deıin óz tarıhynda 1978 jáne 1986 jylǵy dúnıejúzilik dodalarda top jarǵany belgili.

Nıderland fýtbolshylarynyń álem chempıonattarynyń fınalynda joly bolmaı júrgeni málim. Olar úsh márte sońǵy básekege shyqqanymen, birde-bir ret jeńis tuǵyryna kóterile almady.

Buǵan deıin qos komandanyń ózara joldary toǵyz ret toqaılasyp, tórteýinde nıderlandyqtar, bireýinde argentınalyqtar jeńiske jetken, tórt ret teń tarqasqan. Sonyń ishinde 2014 jyly Brazılııada ótken chempıonatta Argentına Nıderland quramasyn jartylaı fınalda 0:0 esebimen bitken matchta penaltı serııasynda ǵana utyp, qapyda qaldyrǵan bolatyn. Sodan beri biraz ýaqyt ótip, kóptegen ózgerister bolǵanymen, Argentınanyń jaryq juldyzy, 35 jastaǵy Lıonel Messı áli de sapta.

Birinshi taımda esep dál sol Messıdiń qatysýymen ashyldy. Naýel Molınadan dop alǵan Messı aıyp alańyna qaraı jaqyndap, áriptesine qaıta dál pas berdi. Qaqpashy Andrıs Noppertpen betpe-bet shyqqan Molına múlt ketken joq – 1:0.

Ekinshi kezeńde 71-mınýtta nıderlandtyq qorǵaýshy Denzel Dýmfrıs óz aıyp alańynda Markos Akýnıany shalyp shyqty. 73-mınýtta Messı 11 metrlik núkteden esepti 2:0-ge jetkizdi. Bul Messıdiń álem chempıonattaryndaǵy onynshy goly edi.

Degenmen 83-mınýtta oń qanattan Steven Bergheıs asyrǵan dopty Výt Veghorst baspen torda týlatyp, esepti qysqartty – 1:2. Bulardyń ekeýi de tyńnan qosylǵan oıynshylar edi. Qosymsha ýaqyt aıaqtalar tusta (90+11) nıderlandtyqtar aıyp dobyn oryndaǵanda, Výt Veghorst tarazy basyn teńestirip ketti – 2:2.

Budan keıin eki ekstrataımda argentınalyqtar kóbirek qaýip tóndirgenimen, esep ózgermeı, match taǵdyry penaltı serııasynda sheshildi. Onda Argentına qaqpashysy Emılıano Martınes qatarynan eki penaltıdi qaıtardy.

Osylaısha, penaltı serııasynda Nıderland quramasyn 4:3 esebimen utqan Lıonel Skalonıdiń shákirtteri 13 jeltoqsan kúni fınalǵa shyǵý úshin Horvatııa quramasymen talasady.

Eske sala keteıik, budan buryn Brazılııanyń bas bapkeri ornyn bosatqanyn jazǵan bolatynbyz.

Sondaı-aq Lıonel Messı álem chempıonattaryndaǵy onynshy golyn soqty.

Foto: CLIVE BRUNSKILL/GETTY IMAGES