Qatar-2022: Messı Úzdik oıynshy ataǵyn segizinshi ret jeńip alyp, rekord ornatty

ASTANA. QazAqparat – Argentına quramasynyń kapıtany Lıonel Messı álem chempıonattarynyń matchynda «Úzdik oıynshy» ataǵyn segizinshi ret jeńip alyp, rekord ornatty, dep habarlaıdy QazAqparat tilshisi.

L.Messı 1/8 fınalda Aýstralııamen ótken básekede sheber óner kórsetip, «Úzdik oıynshy» atandy.

Ol bul kezdesýde mergendik tanytyp, esep ashty. Buǵan deıin Messı álem chempıonattarynda jeti márte «Úzdik oıynshy» ataǵyna qol jetkizgen edi.

Osylaısha, Messı segizinshi ret úzdik atanyp otyr. Buǵan deıin eshkim MVP músinin segiz márte alǵan emes.

Bıylǵy birinshilikte argentınalyq shabýylshy úsh gol soǵyp, bir nátıjeli pas berdi. Shırek fınalda Argentına Nıderland quramasymen oınaıdy.

Eske sala keteıik, budan buryn Brazılııanyń eki fýtbolshysy álem chempıonatynyń qalǵan oıyndaryna qatysa almaıtynyn jazǵan bolatynbyz.

Sondaı-aq Lıonel Messı sport karerasynda myńynshy márte jasyl alańǵa shyqty.

Messı bastaǵan Argentına shırek fınalǵa shyqty.

Foto: GETTYIMAGES