Qatar-2022: Marokkolyq qaqpashy oıyn bastalmastan almasyp ketti

ASTANA. QazAqparat - Qatarda ótip jatqan fýtboldan álem chempıonatyndaǵy Marokko men Belgııa kezdesýinde qyzyqty jaǵdaı boldy.

Marokkolyq qaqpashy ıAssın Bono alǵashqyda negizgi quramda alańǵa shyǵyp, oıyn bastalmastan ornyn Mohand Mýnırge bosatyp bergeni belgili boldy, dep habarlaıdy QazAqparat tilshisi.

Oqıǵa barysy bylaısha órbigen. ıAssın Bono negizgi quramda alańǵa shyqty, odan keıin ánurandy oryndady. Qarsylas qurama oıynshylarymen qol alysty. Sodan keıin ornyn áriptesi Mohand Mýnırge bosatyp berýge májbúr boldy.

Oǵan basty sebep retinde ıAssın Bononyń oıyn aldyndaǵy jattyǵý barysynda alǵan jaraqaty aıtylýda. Marokko quramasynyń bas bapkeri Valıd Regragýı ony alǵashqyda negizgi quramǵa qosty. Degenmen fýtbolshynyń densaýlyǵyna zııan tımeýi úshin ony oıyn bastalmastan basqa qaqpashyǵa aýystyrǵan.

Eske salsaq, F tobynda synǵa túsetin Marokko quramasy sensatsııa jasap, Belgııadan basym tústi.

Atalǵan qurama birinshi týrda Horvatııamen teń oınady.

Foto: : BUDA MENDES/GETTY IMAGES