Qatar-2022: Ispanııa quramasynyń bas bapkeri aýysty
ASTANA. QazAqparat – Qatarda fýtboldan ótip jatqan álem chempıonatyna qatysqan Ispanııa quramasynyń bas bapkeri aýysty, dep habarlaıdy QazAqparat tilshisi.
Ispanııa fýtbol federatsııasynan málim etkenindeı, ulttyq qurama tizginin ıspanııalyq maman Lýıs de la Fýente ustady.
Buǵan deıin de la Fýente Ispanııa jasóspirimder jáne jastar quramasyn jattyqtyrǵan.
Maman óz qyzmetine Qatardaǵy álem chempıonaty aıaqtalǵannan keıin kirisedi. Jańa bas bapker komandasyn aldaǵy jyly naýryz aıynda 2024 jylǵy Eýropa birinshiliginiń irikteý satysynda Norvegııa men Shotlandııamen ótetin matchtarǵa daıyndaıtyn bolady.
Lýıs de la Fýenteniń basshylyǵymen Ispanııa quramasy 2020 jylǵy Tokıo olımpıadasynyń kúmis júldegeri atanǵan edi.
Buǵan deıin bas bapker mindetin taǵy bir ıspanııalyq Lýıs Enrıke atqarǵan bolatyn. Ispanııa quramasy 1/8 fınalda Marokkodan penaltı serııasynda jeńilip qalǵannan keıin L.Enrıke men bapkerler shtaby túgeldeı ketti.
Eske sala keteıik, budan buryn arab elderiniń Marokkonyń jeńisin toılap jatqanyn jazǵan bolatynbyz.
