Qatar-2022: Irandy jeńgen AQSh pleı-ofqa joldama aldy

ASTANA. QazAqparat – Qatarda fýtboldan ótip jatqan álem chempıonatynda V tobynda Iran men AQSh quramalary pleı-off joldamasyn sarapqa saldy, dep habarlaıdy QazAqparat tilshisi.

Bul topta ekinshi týrdan keıin Anglııa 4 upaımen kósh bastasa, ırandyqtar (3 upaı) 2-orynda edi. Sáıkesinshe 2 jáne 1 upaıy bar AQSh pen Ýels quramalary da joldamadan úmit úzbegen bolatyn.

Aldymen Anglııaǵa 2:6 esebimen oısyraı utylǵan Iran quramasy keıin eńse túzep, Ýelsti jeńgen-di – 2:0. AQSh bolsa, Anglııamen de, Ýelspen de teń oınaǵan.

Onyń ústine Iran men AQSh elderi bir-birimen qyrǵıqabaq bolǵandyqtan, atalmysh oıynnyń saıası astary da bar-dy.

Osyǵan deıin 1998 jyly Frantsııada ótken birinshilikte Iran AQSh-ty 2:1 esebimen utyp, keıin joldastyq kezdesýde teń tarqasqan edi.

Bul joly tek jeńis kerek bolǵandyqtan, amerıkalyqtar kóp uzamaı-aq oıyn tizginin qolǵa aldy. 38-mınýtta Ýeston Makkennı oń qaptalǵa ádemi dop asyrdy. Ony Serjıno Dest baspen qaqpaǵa qaraı baǵyttasa, Krıstıan Pýlıshıch múmkindigin múlt jibergen joq – 1:0.

Ekinshi kezeńde ırandyqtar tarazy basyn teńestirýge tyrysqanymen, olarǵa urymtal sátterde dáldik jetispeı jatty.

Osylaısha, V tobynan Anglııamen birge AQSh pleı-off kezeńine joldama aldy. 1/8 fınalda Nıderland AQSh-pen, Anglııa Senegalmen oınaıdy.

Eske sala keteıik, budan buryn Portýgalııanyń Frantsııa men Brazılııadan keıin pleı-off kezeńine shyqqanyn jazǵan bolatynbyz.

Sondaı-aq Iran-AQSh matchy nesimen álem nazaryn aýdaryp otyr.

A tobynan Nıderland birinshi orynmen pleı-off satysyna shyqty.

Ekvadordy joldan taıdyrǵan Senegal pleı-ofqa shyqty.

Nıderland quramasynyń shabýylshysy óz eliniń rekordyn ornatty.