Qatar-2022: Iran-AQSh matchy nesimen álem nazaryn aýdaryp otyr

ASTANA. QazAqparat – Qatarda fýtboldan ótip jatqan álem chempıonatynda toptyq básekede seısenbi kúni Iran men AQSh quramalary synǵa túsedi, dep habarlaıdy QazAqparat tilshisi.

AlJazeera saıtynan alynǵan málimetke qaraǵanda, Iran jeńiske jetken jaǵdaıda alǵash ret pleı-off kezeńine shyqpaq. Sonymen qatar bul básekeniń saıası salmaǵy da basym bolyp otyr.

Alǵash ret komandalar ózara 1998 jyly Frantsııada ótken chempıonatta kezdeskeni belgili. Bul 1979 jylǵy Iran tóńkerisinen soń Tegeran men Vashıngton qarym-qatynasty úzgennen keıin birinshi match boldy. Sondyqtan oǵan álem kóz tikti deýge bolady.

AQSh fýtbol federatsııasynyń basshysy sol matchty eń mańyzdy dep baǵalady. Frantsııa bıligi stadıonǵa polıtsııa qyzmetkerlerin ádettegiden úsh ese kóp jiberdi. Biraq olardyń kómegi qajet bolmady. Irandyq oıynshylar qarsylastaryna gúl shoǵyn syılap, birge sýretke túskennen keıin qaýiptiń bári seıildi.

Búgingi oıyn da osyndaı sebeppen saıasılandyrylyp otyr.

Iranda 70 kúndeı qarsylyq sharalary jalǵasýda, olarda BUU derekteri boıynsha 300-den astam adam qaza tapty.

Bir apta buryn Iran fýtbol quramasy Anglııamen match aldynda ulttyq gımndi oryndaýdan bas tartyp, qarsylyq sharasyn qoldady. Degenmen olar budan keıin fýtbolǵa bet buryp, Ýelspen oıynda gımndi shyrqady.

Birneshe kún buryn AQSh áleýmettik jelide týrnırlik kesteni jarııalaǵan kezde Irannyń týyn burmalap kórsetti. Bul Iran tarapynan daý týǵyzyp, fýtbol federatsııasy FIFA-nyń ádep jónindegi komıtetine AQSh federatsııasyna eskertý jarııalap, quramasyn 10 oıynǵa shettetý týraly aryzyn joldady.

Aqyry amerıkalyq federatsııa áleýmettik jelilerde Irannyń týyn durysyna aýystyryp, AQSh quramasynyń bas bapkeri Gregg Berhalter keshirim surady. Degenmen Irannyń resmı ókilderi AQSh-ty eldegi tártipsizdik pen sodyrlyq kórinisterin uıymdastyrýshy retinde kinálaýyn jalǵastyrýda.

Iran quramasynyń bas bapkeri Karlýsh Keırýsh kelesi álemdik dodada saıasılandyrýdyń azaıyp, fýtbolǵa kóbirek mán beriletinine senim bildirdi. Sportty ıgilik úshin paıdalaný kerek, dedi ol.

Iran-AQSh matchy 29-ynan 30 qarashaǵa qaraǵan túni Ar-Raııanda «Ahmed bın Alı» stadıonynda elorda ýaqytymen saǵat 01.00-de bastalady. Taǵy bir kezdesýde Ýels pen Anglııa sheberlik baıqasady. Pleı-off joldamasynan tórt qurama da úmitin úze qoıǵan joq.

Eske sala keteıik, budan buryn Shveıtsarııany utqan Brazılııany pleı-off kezeńine joldama alǵanyn jazǵan bolatynbyz.

Sondaı-aq bir matchta eki gol soqqan ońtústikkoreıalyq fýtbolshy rekord ornatty.

Portýgalııa Frantsııa men Brazılııadan keıin pleı-off kezeńine shyqty.