Qatar-2022: F tobynda Marokko birinshi oryn aldy
ASTANA. QazAqparat - Qatarda ótip jatqan fýtboldan 2022 jylǵy álem chempıonatynda búgin F tobynda Kanada men Marokko quramalary kezdesti, dep habarlaıdy QazAqparat tilshisi.
Týrnır kestesinde eki quramanyń jaǵdaıy túrlishe bolatyn. Kanadalyq fýtbolshylar alǵashqy eki oıynda jeńilistiń aşy dámin tatyp, jarysty jalǵastyrý múmkindiginen erte aıyryldy. Al Marokko eki kezdesýde tórt upaı jınap, týrnır kestesinde birinshi orynda bekem turǵan edi.
Sondaı-aq, Afrıka qurlyǵynyń ókilderiniń quramynda eýropalyq beldi klýbtarda oıyn kórsetip júrgen fýtbolshylar sany basym. Sondyqtan jankúıerler olardyń jeńisine kóbirek úmit artty.
Kezdesý barysynda alǵashqy mınýttan marokkolyq fýtbolshylar belsendi bastady. Nátıjesinde kanadalyq qaqpashynyń óreskel qateligin sheber paıdalanǵan marokkolyq Hakım Zıesh 4-mınýtta esep ashty. Al 32-mınýtta ıÝssef En-Nesırı esepti ústemeleı tústi.
Oıynnyń 40-mınýtynda Naıf Ager óziniń qaqpasyna gol soǵyp aldy.
Ekinshi kezeńde quramalar bir-biriniń qaqpasynan sańylaý taba alǵan joq.
Nátıjesinde Marokko qarsylasynan 2:1 esebimen basym tústi.
Marokkolyq fýtbolshylar álem chempıonatyna altynshy márte qatysyp otyr. 1986 jyly olar 1/8 fınalǵa deıin jetti. Endi 36 jyldan keıin sol jetistigin jańalaı ala ma?
Atalǵan toptaǵy taǵy bir kezdesýde Horvatııa men Belgııa 0:0 esebine qanaǵat bildirdi.
Nátıjesinde atalǵan toptan Marokko birinshi, Horvatııa ekinshi oryn alyp, pleı-off satysyna shyqty.
Sondaı-aq, elorda ýaqytymen 1:00-de E tobyndaǵy Japonııa men Ispanııa («Qazaqstan»), Kosta-Rıka men Germanııa («Qazsport») quramalary kezdesedi.
Aıta ketsek, 2 jeltoqsanda elorda ýaqytymen 21.00-de H tobynda Gana men Ýrýgvaı, Ońtústik Koreıa men Portýgalııa, 01.00-de G tobynda Serbııa men Shveıtsarııa, Kamerýn men Brazılııa quramalary sheberlik baıqasady.
Al 3 jeltoqsanda 1/8 fınal oıyndary bastalady. Buǵan deıin jarystyń atalǵan satysyna Frantsııa, Avstralııa, Brazılııa, Portýgalııa, Nıderland, Senegal, Anglııa, AQSh, Argentına, Polsha quramalary joldama aldy.
