Qatar-2022: Ekvadordy joldan taıdyrǵan Senegal pleı-ofqa shyqty
Bul topta ekinshi týrdan keıin Nıderland pen Ekvador 4 upaımen alǵashqy eki oryndy bólisip turǵan. Senegalda 3 upaı bolsa, eki oıynda jeńilip qalǵan Qatar pleı-off joldamasynan úmitin úzgen-di.
Nıderlandtyń alań ıelerimen matchta favorıt ekeni anyq, sondyqtan olardyń Qatardan utylýy neǵaıbyl edi. Sondyqtan Ekvador men Senegal ekinshi joldamany ózara sarapqa saldy. Bul rette Ekvadorǵa teń nátıje de jetkilikti edi.
Belgili fýtbolshy Alıý Sısse budan jıyrma jyl buryn Senegal quramasynyń kapıtany retinde alǵash ret álem chempıonatynyń shırek fınalyna deıin jetken-di. Qazir ol – osy komandanyń bapkeri.
Ekvador 2006 jylǵy birinshilikte dúnıejúzilik dodanyń pleı-off básekesine shyqqan bolatyn.
Osyǵan deıin qos qurama joldastyq eki kezdesý ótkizip, onda senegaldyqtar 1:0, 2:1 esebimen basym túsken-di.
Bul joly Senegalǵa tek jeńis kerek bolǵandyqtan, olar kóbirek shabýyldady. 42-mınýtta ekvadorlyq qorǵaýshy Pero Inkape aıyp alańyna ekpindeı kirgen Ismaıla Sarǵa qarsy oıyn tártibin buzdy. I.Sarr 44-mınýtta 11 metrlik núkteden múlt ketken joq – 1:0.
Ekinshi kezeńde 67-mınýtta buryshtamadan berilgen doptan keıin ekvadorlyq Moıses Kaısedo tarazy basyn teńestirdi – 1:1. Alaıda 70-mınýtta aıyp doby oryndalǵan soń Senegal kapıtany Kalıdý Kýlıbalı óz komandasyn qaıta alǵa shyǵardy – 2:1.
Osylaısha, Ekvadordan aılasyn asyrǵan Senegal pleı-off kezeńine joldama aldy.
Eske sala keteıik, budan buryn Shveıtsarııany utqan Brazılııany pleı-off kezeńine joldama alǵanyn jazǵan bolatynbyz.
Sondaı-aq bir matchta eki gol soqqan ońtústikkoreıalyq fýtbolshy rekord ornatty.
Portýgalııa Frantsııa men Brazılııadan keıin pleı-off kezeńine shyqty.
