Qatar-2022: Búgin altyn medal ıegeri anyqtalady

ASTANA. QazAqparat - Qatarda ótip jatqan fýtboldan 2022 jylǵy álem chempıonatynda búgin, 18 jeltoqsanda fınalda Argentına men Frantsııa kezdesýi ótedi, dep habarlaıdy QazAqparat tilshisi.

Kezdesý elorda ýaqytymen 18 jeltoqsanda saǵat 21:00-de bastalady.

Tikeleı efır «Qazaqstan» jáne «Qazsport» telearnalarynan kórsetiledi.

Kezdesý el astanasy Lýsaıl qalasyndaǵy 88966 jankúıerge arnalǵan «Lýsaıl Aıkonık» stadıonynda ótedi.

Bas tóreshi - polshalyq Shımon Martsınıak. Oǵan otandastary Pavel Sokolnıtskı men Tomash Lıstkevıch kómekshi bolady. Qosalqy tóreshi - AQSh-tan kelgen Ismaıl Elfat.

FIFA reıtınginde Argentına 3, Frantsııa 4-orynda tur.

Eki qurama buǵan deıin on úsh márte kezdesti. Onyń 7-de Argentına, 3-de Frantsııa jeńiske jetse, qalǵanynda teń nátıje tirkeldi.

2018 jylǵy álem chempıonaty 1/8 fınalynda Frantsııa atalǵan qarsylasyn 4:3 esebimen jeńgen edi.

Toptyq kezeńde Argentına S tobynda Saýd Arabııasyna 1:2 esebimen ese jiberip, Meksıka men Polshany 2:0 esebimen jeńse, 1/8 fınalda Avstralııany 2:1 esebimen utty.

Shırek fınalda Nıderlandpen negizgi kezeńde 2:2 esebimen teń túsip, penaltı tebýde 4:3 esebimen jeńiske jetti. Jartylaı fınalda olar Horvatııany 3:0 esebimen jeńdi.

Toptyq kezeńde D tobynda oınaǵan Frantsııa Avstralııadan 4:1, Danııadan 2:1 esebimen basym tússe, Týnıske 0:1 esebimen jol berdi.

Al, 1/8 fınalda Polshany 3:1, 1/4 fınalda Anglııany 2:1, jartylaı fınalda Marokkony 2:0 esebimen tize búktirdi.

FOTO: GETTY IMAGES