Qatar-2022: Belgııamen teń túsken Horvatııa jarysty jalǵastyrady

ASTANA. QazAqparat – Qatarda fýtboldan ótip jatqan álem chempıonatynda F tobynda Horvatııa men Belgııa quramalary jasyl alańǵa shyqty, dep habarlaıdy QazAqparat tilshisi.

Bul topta eki týrdan keıin Horvatııa men Marokkoda 4, Belgııada 3 upaı bar edi. Al eki oıynda jeńilgen Kanada pleı-oftan úmitin úzgen-di.

Osydan tórt jyl buryn álem chempıonatynyń fınalyna deıin jetip, kúmis júldeger atanǵan horvatııalyqtarǵa Belgııamen matchta teń tússe de, jetkilikti edi. Al belgııalyqtarǵa jeńis aýadaı qajet bolatyn.

Birinshi taımda 15-mınýtta aǵylshyn tóreshisi Entonı Teılor áýeli Belgııa qaqpasyna 11 metrlik aıyp dobyn belgilegenimen, beıneqaıtalaýdy qaraǵannan soń ol oıynan aınyp, horvatııalyq fýtbolshy oıynnan tys qaldy dep tapty.

Ekinshi kezeńde alańǵa shyqqan Belgııa surmergeni Romelý Lýkaký 60-mınýtta soqqan dop qaqpa jaqtaýynan keri qaıtty. Oıyn sońyna taman R.Lýkaký urymtal sátte taǵy da múlt ketti.

Osylaısha, Belgııamen 0:0 esebimen teń oınaǵan Horvatııa ekinshi orynmen pleı-off kezeńine joldama aldy. Bul topta Marokko jeńimpaz atandy.

Eske sala keteıik, budan buryn Týnısten utylǵan Frantsııanyń óz tobynda birinshi orynǵa ıe bolǵanyn jazǵan bolatynbyz.

Sondaı-aq álem chempıonattarynda match ótkizý jóninen Messı Maradonanyń rekordyn jańartty.

Argentına óz tobynan birinshi orynmen pleı-ofqa ótti.

Meksıka quramasynyń bas bapkeri qyzmetinen ketti.