Qatar-2022: Arab elderi Marokkonyń jeńisin toılap jatyr
«Atlas arystandary» atalyp ketken Marokko fýtbolshylary arab elderi tarıhynda alǵash ret dúnıejúzilik dodada shırek fınalǵa shyqty.
Ar-Raııan qalasyndaǵy Education city stadıonynda Ashraf Hakımıdiń penaltı serııasyndaǵy jeńis golynan keıin arab jáne Afrıka elderiniń qalalarynda myńdaǵan jankúıer jappaı toılaýǵa kóshti.
Marokko arab elderiniń qoldaýyn budan buryn da sezine bastady. Óıtkeni Saýd Arabııasy, Týnıs jáne Qatar toptyq básekeden asa almaı qaldy. Sondyqtan jankúıerler nazary F tobynda úzdik shyqqan marokkolyq fýtbolshylarǵa aýdy.
«Biz kúrese bildik jáne Marokko halqyn baqytty ettik, biz tarıhqa endik. Biz buǵan laıyq edik, bizdi alańda Marokko halqy biriktirdi», - dedi Marokko bapkeri Valıd Regragı tarıhı matchtan keıin.
Oǵan jáne komandaǵa Marokko koroli Mohammed VI telefon shalyp, quttyqtady.
Sonymen qatar jeńis qurmetine Qatar ámiri Marokko týyn kóterdi.
«Atlas arystandaryn quttyqtaımyz, bizdi qýanttyńyz. Marokko, muny taǵy sen jasadyń!», - dep jazdy Iordanııa patshaıymy Ranııa Twitter-paraqshasynda.
Sheıh Dýbaı vıtse-prezıdenti, premer-mınıstri jáne bıleýshisi Mohammed bın Rashıd Al Maktým da quttyqtap, «Atlas arystandarynyń jeńisi – barlyq arabtar úshin qýanysh pen maqtanysh», - dedi.
Dohanyń ózinde myńdaǵan marokkolyq jankúıer astananyń ortalyq bazary «Sýk Vakıf»-qa aǵyldy. Olarǵa jalaýlaryn jelbiretken saýdııalyqtar, qatarlyqtar jáne mysyrlyqtar qosyldy. Oǵan qosa Qatardaǵy qos Lýsaıl munarasy Marokko jalaýymen jáne «Jaraısyńdar, arystandar!» degen jazýmen aıshyqtaldy.
Buǵan deıin Marokko quramasy 1986 jylǵy Meksıkadaǵy álem chempıonatynyń pleı-off kezeńinde bir-aq ret baq synady. Arada 36 jyl ótkende, sol kórsetkishinen asyp túsip otyr.
Eske sala keteıik, budan buryn Marokkonyń sensatsııa jasap, 1/8 fınalda Ispanııany jeńip ketkenin jazǵan bolatynbyz.
Sondaı-aq Portýgalııa fýtbolshysy pleı-off kezeńinde gol soqqan eń saqa oıynshy atandy.
Shveıtsarııany oısyrata utqan Portýgalııa shırek-fınalǵa shyqty.
Foto: AlJazeera, AFP
