Qatań sharalar qabyldaýǵa májbúr bolamyz — Makron Qytaıǵa eskerý jasady

ASTANA. KAZINFORM — Frantsııa prezıdenti eger Beıjiń Eýropamen aradaǵy úlken saýda tapshylyǵyn qysqartý boıynsha qadamdar jasamasa, Eýropalyq Odaq «jaqyn arada» qytaı ónimderine baj salyǵyn engizýi múmkin dep málimdedi, dep habarlaıdy Agenzia Nova. 

— Olarǵa eger jaýap bermese, Eýropa AQSh sııaqty qatań shara qoldanyp, qytaı taýarlaryna baj salyǵyn engizýi múmkin ekenin aıttym, — dedi Emmanıýel Makron Qytaıǵa resmı saparynan oralǵannan keıin «Les Échos» gazetine bergen suhbatynda.

Frantsııa kóshbasshysy AQSh ákimshiliginiń protektsıonızmi Qytaıdyń saýda aǵyndaryn EO naryǵyna burý arqyly «eýropalyq máselelerdi ýshyqtyryp otyrǵanyn» qosty.

— Búgin biz qaqpanǵa tústik, jáne bul eýropalyq ónerkásip úshin ómir men ólim máselesi, — dep málimdedi ol.

Makron Eýropa Qytaı ınvestıtsııalaryn qoldaýy tıis on strategııalyq sektordy atady — akkýmýlıatorlardan bastap fotoelektrlik júıelerge, lıtııdi qaıta óńdeýden robototehnıkaǵa deıin.

Elıseı saraıynyń prezıdenti birtutas eýropalyq ustanymdy qalyptastyrý «ońaı emes» ekenin moıyndap, Germanııanyń Qytaıdaǵy kúshti ónerkásiptik qatysýyna baılanysty qarsylyǵyn atap ótti. Ol EO bir mezgilde avtomobıl ónerkásibi sııaqty osal sektorlardy qorǵaýy jáne «jeńildetý, ıntegratsııalanǵan biryńǵaı naryq, ınnovatsııaǵa ınvestıtsııa salý jáne tıisti aqsha-nesıe saıasaty» arqyly básekege qabilettilikti arttyrýy kerek degen qorytyndyǵa keldi.

Buǵan deıin Frantsııa prezıdenti Emmanıýel Makron Qytaıǵa tórtinshi memlekettik sapar jasaıtynyn jazǵan edik. 

Sondaı-aq QHR tóraǵasy Sı Tszınpın Qytaıdyń Gaza sektoryndaǵy gýmanıtarlyq daǵdarysty jeńildetý men ony qalpyna keltirý jumystaryn qoldaý maqsatynda $100 mln bóletinin jazdyq.

Sı Tszınpın bul málimdemeni Beıjińde Frantsııa prezıdenti Emmanıýel Makronmen kezdesýden soń bolǵan baspasóz-máslıhaty barysynda jasady.