Qatań karantın: Atyraý oblysynda talaptyń saqtalýyna reıd ótýde
ATYRAÝ. QazAqparat –Atyraý oblysynda qatań karantın erejelerin buzǵandar anyqtaldy, dep habarlady QazAqparat.
Óńirlik kommýnıkatsııalar qyzmetiniń málimetinshe, mobıldi top músheleri júrgizgen reıdtik sharalar kezinde karantın talabyn buzǵan birneshe derek tirkelgen.
«Reıd kezinde 40-tan asa azyq-túlik dúkeni, dámhana men meıramhanalar tekserilip, olardyń arasynda shektelgen ýaqyttan tys jumys isteý faktileri anyqtaldy. Sonymen qatar, 11 shildede Aqqystaý aýyldyq okrýginde júrgizilgen tekseris kezinde otbasylyq jıyn-toı ótkizip jatqan bir otbasy anyqtaldy. Atalǵan derekter qatysty tıisti sharalar qabyldaý úshin materıaldar Atyraý qalalyq Taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldandy», - delingen aqparatta.
Sondaı-aq Atyraý qalalyq polıtsııa basqarmasy patrýldik polıtsııa basqarmasynyń vzvod komandıri Jasulan Kamaredenovtiń aıtýynsha, túngi saǵat 23:00-den keıin júrgen 6 kólik ıesine eskertý berildi. Jumysker aýylynda kólik jóndeý ortalyǵynyń jumys istep turǵany anyqtalsa, túngi saǵat 00:30 shamasynda Vokzal mańy yqshamaýdanynda azyq-túlik dúkeni saýda-sattyq jasaǵan.
Reıd kezinde oblys turǵyndaryna otbasylyq jıyn-toı ótkizbeý jóninde túsindirý jumystary júrgizilgen. Al, kásipkerlerge Atyraý oblysynyń bas sanıtarlyq dárigeriniń qaýlysymen engizilgen talaptardy tolyq saqtaý qajettigi eskertildi.
Eske salaıyq, 11 shilde saǵat 00.00-den bastap Atyraý oblysynda karantın kúsheıtilgen bolatyn.
Qazir Atyraý óńiri koronavırýsqa shaldyqqan naýqastar sany boıynsha elimizde aldyńǵy orynda tur.
