Katalonııadaǵy hımııalyq apat: qaýipti aımaqta 160 myń adam bar

ASTANA. KAZINFORM — Senbi kúni tańerteń Katalonııadaǵy Vılanova-ı-la-Jeltrý qalasyndaǵy hımııalyq zaýytta iri órt shyqty, dep habarlaıdy euronews.

Kásiporyn qoımasynda shamamen 70 tonna hlor saqtalǵan, onyń janý ónimderi ýly bult túzip, aýaǵa taraǵan.

Qaýipti aımaqta shamamen 160 myń adam qalǵan. Bılik turǵyndardy (nemese jumys ornyndaǵylardy) úıde qalýǵa, esik-terezelerdi myqtap jabýǵa jáne kondıtsıonerlerdi óshirýge shaqyrdy.

Apat ornyna ondaǵan órt sóndirý jáne qutqarý brıgadalary jiberildi. Dárigerler de tolyq daıyndyq rejıminde jumys isteýde; qazirgi tańda zardap shekkender týraly aqparat túsken joq.

Katalonııalyq órt sóndirýshilerdiń aıtýynsha, olar órt oshaǵyn oqshaýlap, jalynnyń kórshi óndiristik ǵımarattarǵa taralýyna jol bermegen. Azamattyq qorǵanys qyzmeti jeldiń áserinen ýly bulttyń teńiz jaqqa qaraı yǵysyp jatqanyn, sondyqtan halyq tyǵyz ornalasqan aýdandarǵa qaýiptiń az ekenin atap ótti.

Soǵan qaramastan, jergilikti ákimdikter ashyq alańdaǵy sporttyq jáne áleýmettik is-sharalardy toqtatty, al birqatar tas joldar jabyldy — bul eń aldymen órt sóndirýshilerdiń jumysyna kedergi keltirmeý úshin jasaldy.