Katalonııadaǵy ash qursaq eshkiler Ispanııadaǵy orman órtimen kúresýge kómektese bastady
ASTANA. KAZINFORM — Jaz saıyn Ońtústik Eýropa elderinde aptap ystyq klımattyń ózgerýine baılanysty orman órtine sebep bolyp, keń aýmaqtardy kúlge aınaldyrady. Alaıda byltyr Katalonııada júzjyldyqtaǵy úshinshi qatty qurǵaqshylyqqa qaramastan, órttiń sany azaıǵan. Óńirlik úkimet muny órtke qarsy qaýipsizdik sharalarynyń jaqsarǵanymen túsindiredi. Bul sharalardyń biri — eshkiler, dep jazdy AZERTADJ.
Katalonııanyń soltústigindegi tas jolmen shamamen 300 qara, qońyr jáne shubar eshki qońyraý únimen júredi. Olar anda-sanda toqtap, orman shetindegi qurǵaq butalardy súısinip jeıdi. Qala-qalalardy aralap kóship júretin bul tabyn — Mataro qalasynda bastalǵan pılottyq jobanyń bir bóligi. Bul joba orman órtiniń qaýpin azaıtýǵa baǵyttalǵan Eýropalyq Odaq qarjylandyratyn aýqymdy bastamanyń quramyna kiredi, dep jazady Reuters.
Eshkiler — ashqaraq ári tikendi ósimdikterdi, kaktýs pen oshaǵan sııaqty butalardy da jeı beretin janýar. Sondyqtan olar ormandaǵy janǵysh materıaldardy — buta-bórik pen ósimdikterdi — tabıǵı órtke qarsy jolaqtarǵa aınaldyrý úshin taptyrmas kómekshi.
Ormandardaǵy janǵysh astyńǵy qabatty tazartý úshin maldy paıdalaný tájirıbesi birneshe ǵasyrdan beri bar. Alaıda qazirgi ýaqytta kóptegen fermerler tehnıkaǵa súıenip ketken. Degenmen keıbireýleri qaıtadan ekologııalyq taza aýyl sharýashylyǵy ádisterin izdep, eshki men basqa da janýarlarǵa oralýda. Mysaly, Ispanııanyń Galısııa óńirinde bul qyzmetti jabaıy jylqylar atqarady.
Shopandar óz qyzmetteri úshin keıbir qalalar men aýyldardan jalaqy alady, al olardyń eshkileriniń sútin ásirese irimshik óndirýshiler joǵary baǵalaıdy. Biraq bul tabys kózderi malshylardy salyq pen sanıtarlyq normalarǵa qatysty qosymsha bıýrokratııalyq qıyndyqtarǵa da tap qylyp otyr.
Únemi qozǵalysta júretin bul janýarlar ártúrli ósimdiktermen qorektenedi jáne qosymsha jemdi qajet etpeıdi. Sonyń nátıjesinde maýsymǵa qaraı dámi ózgeretin, táttirek, maılyraq ári aqýyzy kóp qurt (tvorog) alynady.
Al sút pen qalalyq ákimdikterden túsetin tabys orman órtteriniń aldyn alýǵa baǵyttalǵan baǵdarlamalar aıasynda zamanaýı qural-jabdyqtar satyp alýǵa jumsalady.
Buǵan deıin habarlanǵandaı, Ispanııa halqynyń sany 49,3 mıllıon adamnan asty.