Katalonııada tolassyz jaýǵan jańbyrdan sý tasqyny boldy

ASTANA. KAZINFORM – Katalonııada jappaı sý tasqyny saldarynan eki adam iz-túzsiz joǵalyp ketti, dep habarlaıdy Kazinform BILD basylymyna silteme jasap.

Tolassyz jaýyn-shashynnan Katalonııa qatty zardap shekti. Ózender arnasynan asyp, kólikterdi tasqyn sý alyp ketti. Qutqarý qyzmetteri Barselonadan 50 shaqyrym jerde ornalasqan Kýbelles qalasynda aǵys alyp ketken degen boljam boıynsha joǵalǵan eki adamdy izdestirý jumystary júrip jatqanyn habarlady. 

Bir kún buryn Katalonııa bıligi aýa raıynyń qaýiptiliginiń eń joǵary deńgeıin jarııalaǵan edi. Keıbir jerlerde, meteorologtardyń málimetinshe, bir sharshy metrge 100 lıtrden astam jaýyn-shashyn túsken.Qazirgi kezge deıin atalǵan aımaqta 70-ten astam adam medıtsınalyq kómekke júgingen. 

Tótenshe jaǵdaıǵa baılanysty Katalonııada poıyz qozǵalysy ýaqytsha toqtatyldy. Sonymen qatar Barselonadaǵy aýrýhanalardyń birinde elektr qýaty úzilip qalǵan.

Odan bólek AQSh-qa ushatyn ushaq ta áýejaıǵa qaıtyp oralýǵa májbúr bolǵan. Áýe kemesi aspanǵa kóteriler aldynda ushaqtyń tumsyǵy burshaqtan zaqymdanǵan. Sondaı-aq Barselonada Cruïlla mýzyka festıvaliniń ashylýy toqtatyldy jáne barlyq saıabaq ýaqytsha jabyldy. 

Eske sala keteıik, buǵan deıin aptap ystyqqa baılanysty Italııa men Ispanııada qyzyl deńgeıli dabyl jarııalanǵanyn jazǵan edik. 

Sondaı-aq ystyqtan Frantsııada eki adam kóz jumǵanyn jáne Ispanııada alǵashqy ólim jaǵdaıy tirkelgenin habarlaǵan bolatynbyz.