Katalonııa týrısterge arnalǵan salyqty 12 eýroǵa deıin kóterdi

ASTANA. KAZINFORM — Ispanııadaǵy týrıster arasynda eń tanymal aımaq sanalatyn Katalonııada týrıstik salyq 12 eýroǵa deıin kóbeıdi, dep habarlaıdy Anadoly.

Avtonomdy qaýymdastyq parlamentiniń sheshimine sáıkes, 1 sáýirden bastap týrısterge arnalǵan salyq eki esege artady. Eń úlken ósim Barselona qalasynda baıqalady.

Katalonııa úkimeti (Generalitat) derekteri boıynsha jańa stavkalar boıynsha:

• Barselonadaǵy bes juldyzdy qonaqúılerde — 7 eýro/1 tún,

• tórt juldyzdy qonaqúılerde — 3,4 eýro/1 tún,

• týrıstik apartamentter men uqsas oryndarda — 4,5 eýro/1 tún,

• basqa ornalastyrý oryndarynda — 2 eýro/1 tún.

Sonymen qatar, Barselona qalalyq týrıstik alymyn 4-ten 5 eýroǵa deıin kóterdi.

Osylaısha, ótken jyly Barselonada 5–7,5 eýro tólegen týrıst 1 sáýirden bastap shamamen 12 eýro tóleıtin bolady.

Barselona mýnıtsıpalıteti 2029 jylǵa deıin alymdy jyl saıyn 1 eýroǵa kóterip, ony 8 eýroǵa jetkizýdi josparlap otyr. Osylaısha, 2029 jyly qonaqúılerdegi jalpy týrıstik salyq 1 túnge 15 eýroǵa jetýi múmkin.

Katalonııanyń basqa týrıstik qalalary — Jırona, Tarragona jáne jaǵalaý eldi mekenderinde salyq 50%-ǵa ósedi, bul Barselonaǵa qaraǵanda az. Katalonııa úkimeti jınaqtalǵan qarajattyń 25%-y turǵyn úı saıasatyna, qalǵany Týrızmdi damytý qoryna jumsalatynyn habarlady.

Ispanııada týrıstik salyq alǵash ret 2012 jyly Katalonııada engizilgen. Keıin tómen mólsherlemelermen Galısııa men Balear araldary da osyndaı sharalardy qabyldaǵan.

Budan buryn myńdaǵan marokkolyq áıel Ispanııadaǵy maýsymdyq jumysqa tartylatynyn jazǵanbyz.