Katalonııa prezıdenti otstavkaǵa ketetinin málimdedi
ASTANA. QazAqparat - Katalonııa basshysy Artýr Mas óziniń bılikten ketetinin málimdedi. Onyń oıynsha, endi bul orynǵa Jıron Karles Pýchdemon kelýi múmkin.
2010 jyldan beri Ispanııanyń bul bóligin basqarǵan Artýr Mastyń qyzmetten ketýine eldegi «Ulttyq úmitkerler birligi» partııasy men «Bárimiz birgemiz» partııalarynyń arasyndaǵy kelispeýshilik sebep bolǵan. Katalonııanyń táýelsizdigin qoldaıtyn qos partııa koalıtsııa basshysyn tańdaý kezinde ózara talasyp qalǵan. Degenmen ishinara alakózdikke qaramastan, olar ótken jyldyń qarashasynda Ispanııadan bóliný bastamasyn kótergen. Al Madrıd bolsa, buǵan qarsy ekenderin birden-aq kesip aıtty, dep habarlaıdy 24.kz.
