Katalonııa óziniń egemendigin jarııalady
ASTANA. 25 qańtar. QazAqparat - Ispanııanyń Katalonııa provıntsııasynyń parlamenti aýmaqtyń egemendigi týraly shartty túrdegi deklaratsııany maquldady, sóıtip, Ispanııadan táýelsizdik alý máselesi boıynsha refrendým ótkizýge jol ashty, dep jazady Lenta.rý The Guardian basylymyna silteme jasap.
Deklaratsııany 85 adam qoldady, 41-i qarsy boldy, eki depýtat qalys qaldy.
Táýelsizdikti aımaqtaǵy "Konvergentsııa jáne Odaq» blogy jáne Solshyl respýblıkalyq partııa qoldady. Katalondyq sotsıalıster men búkil Ispanııadaǵy bıliktegi Halyqtyq partııa qarsy shyqty. Deklaratsııa shartty túrde qabyldanǵan, ol Barselona men Madrıdtegi ortalyq úkimet arasyndaǵy teketiresti órshite túsedi. Bılik Katalonııanyń táýelsizdikke qatysty barlyq bastamalaryna tusaý salmaq.
Qoǵamdyq pikir saýaldamalary táýelsizdikti jarııalaý máselesinde katalondyqtardyń daýysy ekige jarylyp turǵanyn kórsetedi. Sonymen qatar eger táýelsizdik EO-dan shyǵýdy bildirse, provıntsııa turǵyndary ony qoldamaıdy.
Katalonııadaǵy seperatıstik kóńil-kúı birneshe ǵasyrǵa sozylyp keledi. Sońǵy jyldary Barselona Ispanııadan qarjy daǵdarysyna baılanysty bóliný múmkindigin belsene málimdep júr. Katalonııa Ispanııanyń joǵary damyǵan provıntsııalarynyń biri, ol Ispanııa jalpy ishki óniminiń 20 paıyzyn beredi.
