Katalın Radý: AQSh-qa tikeleı reıster ushýy úshin áýe kompanııalary ótinish jiberýi kerek
ALMATY. KAZINFORM — Almatyda ótip jatqan «Green Airports» aımaqtyq semınary aıasynda Qazaqstannyń avıatsııalyq ákimshiliginiń Bas dırektory Katalın Radý AQSh-qa tikeleı reısterdi ashý protsesi qalaı júretinin túsindirdi.
Onyń aıtýynsha, bul baǵytta tikeleı reıster ashylýy úshin qazaqstandyq áýe kompanııalar FAA-ǵa ótinish jiberýi qajet.
— Áýe kompanııa tarapynan AQSh-qa tikeleı reısterdi júrgizý týraly ótinish berilgennen keıin ǵana FAA (Federaldyq avıatsııa basqarmasy) qyzmetkerleri Qazaqstanǵa kelip, halyqaralyq talaptarǵa sáıkestikti tekseredi. Odan soń Qazaqstannyń avıatsııalyq ákimshiliginiń aýdıtinen ótkennen keıin tikeleı reısterdiń ushyrý protsesi bastalady, — dedi ol.
Sonymen qatar, Katalın Radý AQSh-qa reısterdiń ashylýy Boeing ushaqtarynyń Qazaqstanǵa jetkizilýine baılanysty ekenin atap ótti.
— Áýe kompanııa tarapynan ótinish jiberilýi úshin, aldymen, Boeing Dreamliner ushaǵy óndirýshiden jetkizilýi kerek. Jospar boıynsha bul áýe kemesi 2025 jyldyń aıaǵynda jetkiziledi. Qazaqstanda ótetin aýdıt te josparly túrde áýe kompanııanyń ótinishinen keıin 2025 jyly ótedi, — dedi Katalın Radý.
Eske salaıyq, buǵan deıin Air Astana tobynyń prezıdenti Pıter Fosterdiń AQSh-qa tikeleı reısterdiń ashylýy týraly pikirin jazǵanbyz.
