Qasymovqa kóshede dáret syndyrǵan polıtseı úshin tilshiler aldynda «qyzarýǵa» týra keldi
ASTANA. QazAqparat - QR Іshki ister mınıstri Qalmuhambet Qasymov Almatyda kóshe ortasynda, kólik ishinde otyryp dáret syndyrǵan polıtseıge qatysty túsinikteme berdi, dep habarlaıdy QazAqparat tilshisi.
«Árıne, bul óte uıatty jaǵdaı. Ol tártiptik komıssııanyń aldynda jaýap berdi, jumystan shyǵaryldy. Basqa polıtseıler boıynsha da jumystar atqarylýda. Tıisti shara qoldanamyz. Naqty oryn alǵan oqıǵa úshin búkil polıtsııanyń bet-beınesi osyndaı eken dep aıtýǵa bolmaıdy», - dedi ol búgin Úkimet otyrysynan soń tilshilerge bergen suhbatynda.
Bunyń aldynda habarlaǵanymyzdaı, Almatyda kólikte otyryp dáret syndyrǵan Túrkisib aýdandyq Іshki ister bólimi polıtseıi jumysynan qýyldy.
«Kólikte otyrǵan onyń áriptesi atqaryp otyrǵan qyzmetinen bosatyldy, olardyń basshysy da tártiptik jazaǵa tartyldy», - dedi mınıstr.
Eske sala keteıik, Motor.kz portaly osyǵan deıin Nissan Primera avtokóliginde otyryp dáret syndyrǵan polıtsııa qyzmetkeriniń fotosyn jarııalaǵan bolatyn. Kóliktiń aldyńǵy bóliginde ekinshi polıtsııa otyrǵan. Basylymnyń habarlaýynsha, fotosýret Qarasaı batyr-Jarokov kósheleriniń qıylysynda túsirilgen.
