Qasymov tranzıttik aýǵan esirtkisiniń qansha kólemi Qazaqstanda qalatynyn aıtty
ASTANA. QazAqparat - Qazaqstan arqyly ótetin aýǵan geroıniniń 10 paıyzy el aýmaǵynda qalady. Bul týraly búgin halyqpen eseptik kezdesý ótkizgen QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Ótken jyly jáne aǵymdaǵy jyldyń basynan beri 4 myńnan astam esirtki qylmysy tirkeldi. Kórshi elderi arqyly bizge jetip, odan keıin Reseı men Eýropaǵa jóneltiletin aýǵan geroıny barynsha qaýipti bolyp otyr. Sarapshylyq baǵalaýǵa sáıkes esirtkiniń 10 paıyzy tranzıt elde qalady. Biz de odan tysqary emespiz», - dedi mınıstr.
Onyń aıtýynsha, elimizde eýropalyq sıntetıkalyq esirtki qaýpi de ýshyǵa túsýde. Dıller olardy ınternet arqyly taratýda. Al olardyń trafıgin qadaǵalaý múmkin emes.
«Ózimizdiń de shıkizattyq baza ahýaldy qıyndata túsýde. Bul - Shý alqabynyń qarasorasy. Al ońtústik óńirlerde, ásirese, Qyzylorda oblysy halqynyń bir bóligi úndi qarasorasyn ósirýmen áýestenip alǵan. Úsh jyldyń ishinde 154 plantatsııa anyqtalyp, bul qarasoranyń 215 tonnadan astamy tárkilendi. Problemaǵa taıaýda ǵana Májilis depýtattarynyń nazar aýdarýy tosynnan emes», - dedi Qalmuhanbet Qasymov.
