Qasymov kólik qaqqan jol retteýshi týraly: Oǵan alataıaqtyń qatysy joq
ASTANA. QazAqparat - QR Іshki ister mınıstri Qalmuhanbet Qasymov Astanda jol retteýshisin kólik qaǵyp ketýi oqıǵasyna pikir bildirdi, dep habarlaıdy QazAqparat.
«Retteýshi jaryq shaǵylystyratyn jabdyqtarda boldy ǵoı. Atalǵan oqıǵaǵa júrgizýshi kináli. Sondyqtan alataıaqtardy qaıtarý qajettigi joq. Bul álemdik tájirıbe, sondyqtan taıaqshalar kerek emes dep sanaımyz», - dedi mınıstr Senattyń jalpy otyrysy kezinde tilshilerge bergen jaýabynda.
Esterińizge sala keteıik, Astana qalasynda Lexus avtokóligi jol qozǵalysyn retteýshini qaǵyp ketti.
«Máńgilik el jáne Buqar jyraý dańǵyldarynyń qıylysynda bolǵan jol kóligi apatyna baılanysty tergeý amaldary júrgizilip jatyr. «Lexus» markaly avtomobıldiń júrgizýshisi kóktaıǵaq saldarynan kólikti basqara almaı, atalǵan jol bóliginde kólik qozǵalysyn rettep turǵan polıtsııa ınspektoryn qaǵyp ketken», - dep málim etti Astana qalasy ІІD-iniń baspasóz qyzmeti. Zardap shekken polıtsııa qyzmetkeri jeńil jaraqattarmen aýrýhanaǵa jetkizilgen.
Budan buryn habarlanǵandaı, QR Іshki ister mınıstrligi jol qıylystarynda qozǵalysty retteıtin polıtseılerge alataıaqtardy qaıtarý qarastyrylmaǵanyn málim etken bolatyn .
2017 jyldyń 1 qańtarynan bastap ishki ister organdarynyń qyzmetkerleri kólikterdi toqtatý úshin arnaıy taıaqsha qoldanbaı keledi. 2017 jylǵa deıin qoldanylyp kelgen polıtseılerdiń alataıaqtary jınaqtalyp, arnaıy saqtaý úshin qoımalarǵa jiberilgen.
