Qasymov Qazaqstanda travmatıkalyq qarýǵa nelikten tyıym salynǵanyn túsindirdi
ASTANA. QazAqparat - Іshki ister mınıstri Qalmuhanbet Qasymov Qazaqstanda travmatıkalyq qarýlarǵa nelikten tyıym salynǵany týraly tilshiler suraǵyna jaýap berdi, dep habarlaıdy QazAqparat tilshisi.
«Birinshiden, travmatıkalyq qarý óziniń sıpaty turǵysynda otty ıir oıyqty myltyqqa uqsaıdy. Ony jaqyn arada qoldanǵan jaǵdaıda naǵyz ıir oıyqty myltyqtan kóp aıyrmashylyǵy joq. Qıyn jaǵdaıǵa, tipti ólimge deıin aparýy múmkin. Ekinshiden, jastar travmatıkalyq qarýdy kıkiljiń kezinde jıi qoldana bastady. Úshinshiden, ony jasyryp alyp júrý óte ońaı. Kez kelgen adam ony kez kelgen jerde qoldana alady. Sondyqtan, osy máseleniń barlyǵyn zertteı otyryp, biz oǵan shekteý qoıý jón dep taptyq. Nátıje birden kórindi. Bizdiń tyıymnan keıin travmatıkalyq qarýdyń qatysy bar qylmystar sany 87 paıyzǵa azaıdy», - dedi mınıstr OKQ-da ótken baspasóz máslıhatynda.
Onyń aıtýynsha, TMD elderi ishinde tek Reseı men Qyrǵyz Respýblıkasynda ǵana azamattarǵa travmatıkalyq qarý alyp júrýge ruqsat berilgen.
«Onyń ústine, Reseıde tyıym salý týraly áńgime qozǵalǵanymen, keıin ol jaqta tek otandyq travmatıkalyq qarýlardy alyp júrýge ruqsat berdi. Ony qoldanýǵa Japonııa, Malaızııa, Avstrııa, Qytaı elderinde de tyıym salynǵan. Ekinshiden, Grýzııa, Lıtva, Estonııa, Fınlıandııa sekildi elderde travmatıkalyq qarýdy ustap júrmeı-aq (ıaǵnı, úıinde ustap), ózin-ózi qorǵaý maqsatynda qoldanýǵa ruqsat berilgen», - dedi mınıstrlik basshysy.
Qalmuhanbet Qasymov sonymen birge, Jańa Zelandııa, Izraıl, AQSh, Argentına sekildi elderde zańdy túrde qysqa oqpandy, ıir oıyqty, travmatıkalyq qarýdy ustaýǵa ruqsat berilgenin aıtty.
«Bizdiń oıymyzsha, travmatıkalyq qarýǵa tyıym salý týraly sheshim durys. Ony ustap júrýdiń esh qajeti joq», - dedi mınıstr.
