Qasymov búkil polıtsııany qyzmetinen bosatyp, jańadan kadr irikteýge daıyn
ASTANA. QazAqparat - Qazaqstan polıtsııasynan joǵary nátıje kútý úshin joǵary jalaqymen, tehnıkamen qamtamasyz etý qajet. Bul týraly búgin QR Parlamenti Senatynda ótip jatqan «Jol qozǵalysy salasyndaǵy quqyqtyq retteýdiń jaı-kúıi men problemalary» taqyrybyndaǵy parlamenttik tyńdaý barysynda elimizdiń Іshki ister mınıstri Qalmuhanbet Qasymov málim etti, dep habarlaıdy QazAqparat.
Parlamenttik tyńdaý barysynda senator Sergeı Ershov mınıstrden jol polıtsııasy arasyndaǵy jemqorlyqtyń joǵary ekendigin aıtyp, ony tómendetý úshin qandaı sharalar qolǵa alynatyndyǵyn suraǵan edi.
«Qazir biz Grýzııada jemqorlyqpen kúres jaqsy júrgizilip jatqandyǵy jaıynda jıi oqıtyn boldyq. Sizder tarapynan Grýzııa tájirıbesi zerdelendi me jáne ol qyzyqty ma ári bizde de qoldanýǵa bola ma?» - dedi senator Qasymovqa qarata.
«Grýzııaǵa bizdiń qyzmetkerler birneshe márte bardy, barlyq qyzmetter komıssııa bolyp ta baryp qaıtty. Ol jaqtaǵylar polıtsııa qyzmetkerleriniń bárin jumystan shyǵaryp jiberip, aılyqty 2 ese kótergen. Sodan keıin jańadan jumysqa alǵan. Marhabat. Biz mundaı qadamǵa barýǵa daıynbyz», - dedi mınıstr.
Sonymen qatar ol Qazaqstan polıtsııasyn Germanııadaǵydaı, Amerıkadaǵydaı jasaý qajet degen pikirdiń jıi aıtylatyndyǵyn atap ótti.
«Biz bul tájirıbelerdiń barlyǵyn zerdeledik. Menińshe, germanııalyq, amerıkalyq polıtseılerdikindeı jalaqy, tehnıkamen jáne múmkinshiliktermen qamtamasyz eter bolsaq, onda bizde dál sondaı nátıjege qol jetkize alamyz», - dedi Qasymov.
