Qasymov: Aqmola men Qaraǵandy oblystarynda sý tasqyny qaýpi saqtalady
ASTANA. QazAqparat - Elimizdiń tasqyn sý basqan óńirlerinen 6 myń adam qaýipsiz jerge kóshirildi. Bul jaıynda búgin Úkimettiń selektorlyq rejimdegi otyrysynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Elimiz boıynsha sý basqan aımaqtardan 6 myń adam, 87 myń bastan astam mal qaýipsiz jerge shyǵaryldy. Qazirgi ýaqytta sý tasqyny saldaryn joıý úshin qaýipti ýchaskelerge 3 myńnan astam adam jumyldyryldy. Olar: qutqarýshylar, polıtsııa qyzmetkerleri, Ulttyq gvardııanyń áskerı qyzmetshileri jáne jergilikti atqarýshy organdardyń qyzmetkerleri. 722 tehnıka tartyldy», - dep atap ótti mınıstr.
Onyń dereginshe, shuǵyl jáne ınjenerlik qorǵanys jumystary júrgizilip, 24 myń metrden astam ýaqytsha bógetter turǵyzylǵan. Almaty, Jambyl oblystarynyń jáne Astana qalasynyń quqyq qorǵaý organdarynyń qyzmetkerleri sý tasqyny oryn alǵan aımaqqa halyqtyń dúnı-múlkiniń tonalýyna jol bermeý, halyqqa kómek kórsetý úshin jiberilgen.
«Sý basqan aımaqtaǵy jaǵdaıdy baǵalaý úshin keshe jáne búgin tikushaqpen sholyp shyǵý sharasy júrgizilýde. Taıaý apta ishinde Nura, Esil, Jabaı jáne Kolýton ózenderindegi sý deńgeıiniń artýy boljanýyna baılanysty Qaraǵandy men Aqmola oblystaryndaǵy ahýal kúrdelene túsedi dep kútýdemiz», - dedi Qasymov.
Aıta keteıik, buǵan deıin habarlaǵanymyzdaı elimizdegi 7 óńirdiń 52 eldi mekenin sý basty .
