Qasymov ákimderden 1 mlrd teńge surap otyr
ASTANA. QazAqparat - QR Іshki ister mınıstri Qalmuxambet Qasymovtyń aıtýynsha, jol erejesin buzý xattamalaryn elektrondy úlgide rásimdeýdiń arqasynda quqyq qorǵaýshylardyń biraz ýaqytyn únemdeýge bolady. Alaıda atalǵan júıeni tolyǵymen iske qosý úshin 1 mıllıardqa jýyq aqsha qajet, dep xabarlaıdy QazAqparat tilshisi.
«Ashyǵyn aıtý kerek, bul bastamany tolyqqandy iske asyrý úshin qomaqty qarjy qajet. Búginde Astana boıynsha 50 planshet pen termınal satyp alyndy. Ákimdik jyldyń aıaǵyna deıin taǵy 150 qurylǵyny satyp alyp beremiz dep otyr. Alaıda barlyq jol-patrýldik qyzmetiniń ókilderine 283 qurylǵy qajet. Al respýblıka boıynsha engizý úshin ondaı qurylǵylardyń 2 971 danasy kerek. Oǵan shamamen 874 mıllıon teńge ketedi. Ákimder bizge qoldaý bildirse, quqyq qorǵaýshylardyń jumysyn ábden jeńildetýge bolady», - deıdi Qasymov.
Aıta keteıik, búgin Astanada ákimshilik xattamalardy elektrondy túrde rásimdeý júıesi tanystyryldy. Oǵan sáıkes, jol-parýldik polıtsııa qyzmetkerleri elektrondy xattamalardy mobıldi qosymshalar arqyly toltyrady. Al xattamanyń qaǵaz júzindegi kóshirmesi kólik júrgizýshisine tabystalady. Oǵan bar bolǵany 3-5 mınýt ketedi.
