Qasymbek toqtap turǵan kásiporyndar boıynsha naqty aqparat berýge ýáde etti
ASTANA. QazAqparat - QR Investıtsııalar jáne damý mınıstri Jeńis Qasymbek kelesi aptada toqtap turǵan ónidiristik oshaqtardyń ókilderimen kezdeskennen keıin árbir óndiris boıynsha naqty aqparat berýge ýáde berdi, dep habarlaıdy QazAqparat tilshisi.
«Iá, keshe Elbasy jaǵynan, búgin Úkimet tarapynan turalap qalǵan 72 kásiporynǵa qatysty syn aıtyldy. Rasynda, ındýstrııalandyrý aıasynda bir myńnan astam jańa kásioryndar ashyldy. Qazirgi kezde 72 óndiris jumys istemeıdi. Ondaı jobalar árbir oblysta, árbir aımaqta bar. Stepnogordaǵy «Sareko» zaýyty da bar. Ol «Qazatomóndiris» ulttyq kompanııasyna qaraıdy. Onyń jabylýyna álemdegi baǵalardyń ózgerýi sebep boldy. Budan bólek, taǵy tórt-bes máselesi bar. Sondyqtan osyndaı problemalar bar. Kelesi aptanyń ishinde Premer-Mınıstrdiń birinshi orynbasary Mamın myrza osy másele boıynsha úlken jınalys ótkizedi. Biz ózimiz mınıstrlikte árbir zaýyttyń ókilderimen kezdesemiz dep josparlap otyrmyz. Kelesi aptanyń ishinde barlyq zaýyttar boıynsha naqty aqparat bere alamyn. Qazir Stepnogordaǵy zaýyt isteı me, istemeı me, ony naqty aıta almaıyn», - dedi Qasymbek búgin Úkimettiń otyrysynan keıingi baspasóz máslıhatynda.
Aıta keteıik, búgingi otyrysta QR Premer-Mınıstri Baqytjan Saǵyntaev turalap qalǵan kásiporyndardyń máselesin jan-jaqty zerdelep shyǵýdy tapsyrdy. «Bálkim, keıbir kásiporyndardy múldem jaýyp tastaǵan tıimdi bolar», - dedi Saǵyntaev. Úkimettiń keshegi keńeıtilgen otyrysynda Memleket basshysy 150 mlrd. teńgeniń 72 kásiporny toqtap turǵany úshin Mınıstrler kabınetiniń jumysyn synǵa alǵan bolatyn .
