Qasym-Jomart Toqaevtyń tóraǵalyq etýimen Álemdik jáne dástúrli dinder lıderleri sezi hatshylyǵynyń kezekti, toǵyzynshy otyrysy aıaqtaldy
ASTANA. Jeltoqsannyń 3-i. QazAqparat. Búgin Astanadaǵy Beıbitshilik jáne kelisim saraıynda Parlament Senatynyń Tóraǵasy, Álemdik jáne dástúrli dinder lıderleri sezi hatshylyǵynyń basshysy Qasym-Jomart Toqaevtyń tóraǵalyq etýimen Álemdik jáne dástúrli dinder lıderleri sezi hatshylyǵynyń kezekti, toǵyzynshy otyrysy aıaqtaldy,
dep habarlaıdy Senattyń baspasóz qyzmeti.
Qorytyndy sózinde Qasym-Jomart Toqaev Hatshylyq jumysyna belsendi qatysqany jáne otyrystyń kún tártibi boıynsha syndarly pikir almasý úshin jıynǵa qatysýshylardyń bárine rızashylyq bildirdi.
Sez qyzmetin odan ári jetildirý isinde Álemdik dinder lıderleriniń turaqty baılanysy men únqatysýlarynyń mańyzdylyǵyn atap óte kelip Tóraǵa «álem halyqtarynyń dástúrli birligi men konfessııaaralyq kelisimi - bizdiń bolashaq urpaǵymyzǵa qaldyratyn eń qundy ıgiligimiz», dep atap ótti.
Otyrysqa qatysýshylar kún tártibine engizilgen barlyq máselelerdi qarady, Hatshylyqtyń toǵyzynshy otyrysynyń hattamasyn bekitti, aldaǵy IV Sez taqyrybynyń jobasyn talqylady jáne Sez hatshylyǵynyń onynshy otyrysyn ótkizetin kúndi belgiledi.
Odan basqa aldaǵy Jıynnyń qorytyndy qujattaryn ázirleý jónindegi Jumys tobynyń quramy bekitildi.
Syrtqy ister mınıstrliginiń erekshe tapsyrmalar jónindegi Elshisi D.Qýanyshev bastaǵan jańa Jumys tobynyń múshelerine arnaǵan sózinde tóraǵa úshinshi Sezde aıtylǵan ıdeıalar men pikirlerdi taldaýǵa qatysty jáne tórtinshi dinı Jıynnyń kún tártibi men taqyryby boıynsha usynystar ázirleýdegi budan bylaıǵy jumystarǵa tilektestik bildirdi.
