Qasym-Jomart Toqaevtyń tóraǵalyǵymen Senat bıýrosynyń otyrysy boldy
ASTANA. Jeltoqsannyń 7-si. QazAqparat. Búgin Qasym-Jomart Toqaevtyń tóraǵalyq etýimen bolǵan Senat bıýrosynyń otyrysynda Palatanyń ústimizdegi jylǵy jeltoqsannyń 11-inde bolatyn kezekti jalpy otyrysynyń kún tártibin qalyptastyrý jónindegi komıtetterdiń usynystary qaraldy,
dep habarlady Senattyń baspasóz qyzmetinen.
Palata depýtattarynyń talqysyna «Táýelsiz memleketter dostastyǵyna qatysýshy memleketterdiń eńbekshi-mıgranttary men olardyń otbasy músheleriniń quqyqtyq mártebesi týraly konventsııany ratıfıkatsııalaý týraly», sondaı-aq «Birikken Ulttar Uıymynyń Jol júrisi týraly konventsııasyn ratıfıkatsııalaý týraly» jáne «Birikken Ulttar Uıymynyń Jol belgileri men sıgnaldary týraly konventsııasyn ratıfıkatsııalaý týraly» zań jobalary usynylatyn boldy.
Senatorlar «Mádenıet týraly» zańǵa ózgerister men tolyqtyrýlar engizý týraly» zań jobasyn da talqyǵa salady.
Sondaı-aq keıbir zańnamalyq aktilerge terrorızmge qarsy jáne qazaqstandyq qamtý máseleleri boıynsha ózgerister men tolyqtyrýlar engizý týraly zań jobalaryn birinshi oqylymda, zańdy tulǵalardy memlekettik tirkeýdi jáne fılıaldar men ókildikterdi eseptik tirkeýdi ońaılatý máseleleri boıynsha ózgerister men tolyqtyrýlar engizý týraly zań jobasyn ekinshi oqylymda qaraý kózdelip otyr.
Otyrys barysynda depýtattar Qazaqstan Respýblıkasy Parlamenti Senaty Apparaty Reglamentine engizý qarastyrylyp otyrǵan ózgerister men tolyqtyrýlardy da talqyǵa salatyn bolady.
