Qasym-Jomart Toqaevtyń Prezıdent laýazymyndaǵy 100 kúni: Brıýsselde brıfıng ótti
NUR-SULTAN. QazAqparat - Brıýsseldegi baspasóz klýbynda Qazaqstannyń Belgııadaǵy Tótenshe jáne Ókiletti Elshisi Aıgúl Quspan «Qasym-Jomart Toqaevtyń Prezıdent laýazymyndaǵy 100 kúni» taqyrybynda baspasóz brıfıngin ótkizdi, dep habarlaıdy QazAqparat tilshisi.
Qalyptasqan dástúrge sáıkes prezıdenttik laýazymdaǵy alǵashqy 100 kún memlekettiń joǵarǵy basshysy qyzmetiniń keıbir qorytyndysyn shyǵarýǵa múmkindik beretin nyshandyq kezeń sanalady. Al A.Quspan ótkizgen brıfıng elimizdiń Prezıdenti laýazymyndaǵy Qasym-Jomart Toqaev qyzmetiniń negizgi qorytyndysyn eýropalyq aýdıtorııaǵa tanystyrýdyń jaqsy múmkinshiligi boldy.
«Osy jyldyń 12 maýsymynda Qasym-Jomart Toqaev laýazymǵa resmı kirisýine arnalǵan resmı sharada sóılegen sózinde óz maqsatyn qoǵam birligin qamtamasyz etý jáne árbir azamattyń quqyǵyn, sonymen qatar Qazaqstannyń ulttyq múddesin qorǵaý retinde belgilegen bolatyn. Memleket basshysy 10 negizgi baǵytty belgilep, júzege asyrýǵa kirisip ketti», - dedi qazaqstandyq dıplomat frantsýz tilinde.
Osydan keıin Elshi atalǵan kezeń ishindegi Qazaqstan Prezıdenti jumys qorytyndysyna keńinen sholý jasap ótti. Ótken aılar oqıǵalarǵa jáne Prezıdent Toqaevtyń naqty sheshimderine toly bolǵandyǵyn aıtty. Bul sheshimder Qazaqstan halqynyń basym bóligine oń qoldaýǵa ıe bolǵan.
A.Quspan tabysy tómen azamattardyń nesıelerin óteýge, halyqtyń tabysyn arttyrýǵa jáne Ulttyq qoǵamdyq senim keńesin qurýǵa basa nazar aýdardy. 2 qyrkúıektegi Prezıdent Joldaýy jaıynda aıta kele qazaqstandyq dıplomat el basshylyǵynyń teńsizdikti qysqartýǵa jáne el azamattarynyń ómir sapasyn jaqsartýǵa aıryqsha nazar aýdaratyndyǵyn atap ótti.
«Prezıdent Joldaýynda mıkro, shaǵyn jáne orta bıznesti qoldaýdy qosa alǵanda saıası jáne ekonomıkalyq damýǵa basa mán berdi», - dep atap ótti A.Quspan.
Shamamen 1,5 saǵatqa sozylǵan baspasóz máslıhaty barysynda elimizdiń syrtqy saıasatyna da aıryqsha nazar aýdaryldy.
Memleket basshysynyń kúntártibi barynsha qanyq boldy: 12 maýsymnan beri Qasym-Jomart Toqaev Qyrǵyzstan, Tájikstan, Qytaı, AQSh, Armenııa jáne Reseıge sheteldik sapar jasady.
A.Quspan sóz sóılep bolǵannan keıin brıfıngke qatysqan Eýropalyq komıssııa sheneýnikteri, dıplomattar, sarapshylyq qoǵamdyq ókilderi men jýrnalıster tarapynan suraqtar qoıyldy. Eýropalyqtardy qazaqstandyq-qytaılyq qarym-qatynas, Qazaqstannyń Afrıka eldermen yntymaqtastyǵy, magıstraldy gaz qubyrlarynyń qurylysy, Nur-Sultanda ótetin Dúnıejúzilik saýda uıymy mınıstrlik konferentsııasyna daıyndyq sharalary jáne densaýlyq saqtaý máseleleri qyzyqtyrdy.
«EO men Ortalyq Azııa arasyndaǵy qatynastardy nyǵaıtý» úkimettik emes uıymy baıqaýshylar keńesiniń múshesi, Ortalyq Azııa boıynsha sarapshy Per Borgoltstiń paıymynsha, Toqaev Prezıdent laýazymyna kirisken alǵashy aılarda kóp is tyndyryldy. Onyń atap ótýinshe, Prezıdent Toqaev óz aldyna QR Tuńǵysh Prezıdenti N.Nazarbaevtyń irgeli rólin jalǵastyrý boıynsha aýqymdy mindet júktedi. Sonymen qatar Prezıdenttiń halyqtyń ekonomıkalyq jáne áleýmettik damýyna aıryqsha nazar aýdarýy quptarlyq is. Bul rette kópbalaly, múgedek balalardy tárbıelep otyrǵan otbasylardyń, halyqtyń turmysy tómen sanattarynyń nesıelerin memlekettiń ótep berý de tańqalarlyq jaıt.
«Eýropa men Azııa, Soltústik pen Ońtústik arasynda kópir bolý mindeti Qazaqstan úshin zor syn-tegeýirin sanalady. Alǵashqy qadam jasaldy da jáne messedjder Qazaqstandy beıbitshilik pen turaqtylyqty qamtamasyz etý úshin araaǵaıyn jasaý maqsatynda Nursultan Nazarbaev júrgizgen saıasattyń jalǵasy ekenin dáleldeıdi. Eýropalyq odaq úshin bul jaqsy belgi. Óıtkeni, Qazaqstan Eýropa úshin strategııalyq seriktes sanalady. Osy negizde bizdiń qarym-qatynasymyz Ortalyq Azııa boıynsha EO-nyń jańastrategııasymen birge gúldenip, damıtyn bolady», - dedi P.Borgolts.
Al baspasóz brıfıngine qatysqan Eýropanyń azııalyq zertteý ınstıtýtynyń aǵa sarapshysy Alberto Tıýrkstra Qasym-Jomart Toqaevtyń Prezıdent laýazymynda qoǵam suranystaryn ómirde júzege asyrý úshin jumys isteıtindigine senimdi.
«Qıyn jaǵdaıǵa tap bolǵan adamdardy, áıelderdi, shaǵyn jáne orta bıznes kásipkerlerin qoldaý shyn máninde jańa Úkimettiń maqsaty ári negizgi mindetine aınaldy. Syrtqy saıasatta Qasym-Jomart Toqaev kórshi eldermen ǵana qatynasqa belsendilik tanytyp otyrǵan joq. AQSh-ta boldy jáne biz taıaý ýaqytta Brıýsselge keletindigine senimdimiz», - dedi Alberto Tıýrkstra.
Avtory Tımýr Dúısekeev
