Qasym-Jomart Toqaevtyń Ońtústik Koreıaǵa memlekettik saparynan vıdeo jarııalandy
NUR-SULTAN. QazAqparat – QR Prezıdenti Qasym-Jomart Toqaevtyń Koreıa Respýblıkasyna memlekettik saparynyń saltanatty rásimi týraly vıdeo jarııalandy, dep habarlaıdy QazAqparat tilshisi.
Vıdeony Prezıdenttiń baspasóz hatshysy Berik Ýálı Facebook paraqshasynda jarııalady. Úzindiden Qazaqstan basshysyn Ońtústik Koreıa tarapy qalaı qarsy alǵanyn kórýge bolady.
Eske salsaq, Prezıdent Qasym-Jomart Toqaevtyń Koreıa Respýblıkasyna memlekettik sapary Kók úıdegi resmı rásimnen bastaldy. Qazaqstan Prezıdentin Ońtústik Koreıa Prezıdenti Mýn Chje In saltanatty túrde qarsy alyp, qurmet kórsetti.
Sapar aıasynda Qazaqstan Prezıdenti Koreıanyń ulttyq batyry Hon Bom Donyń qurmetine oraı ótken rásimge qatysty.
Ońtústik Koreıa Prezıdentiniń rezıdentsııasynda ótken ekijaqty kezdesýde taraptar qazaq-koreı strategııalyq áriptestigin odan ary damytýdyń perspektıvalaryn jan-jaqty talqylady. Sonymen qatar memleketter basshylary ǵalamdyq jáne aımaqtyq ózekti máselelerdi qarastyryp, halyqaralyq qurylymdardaǵy ózara yntymaqtastyqty talqylady.
Qasym-Jomart Toqaev Prezıdent Mýn Chje Inge koreı jerinde kórsetilgen qurmet pen qonaqjaılyǵy úshin rızashylyǵyn bildirdi. Memleket basshysy 2019 jyly Nur-Sultan qalasynda ótken kezdesýdiń qazaq-koreı qarym-qatynasyna tyń serpin bergenin aıtty.
Osy kezdesýden keıin qos eldiń Prezıentteri Qasym-Jomart Toqaev pen Mýn Chje In BAQ ókilderi úshin brıfıng ótkizdi.
«Eki eldiń arasy alshaq bolǵanymen, halyqtarymyz – taǵdyrlas. Koreıa – Qazaqstannyń Shyǵys Azııadaǵy strategııalyq seriktesiniń biri. Qazir san salaly baılanysymyz qarqyndy damyp kele jatyr. Biz búgin osy qarym-qatynasty jańa deńgeıge kóterý úshin ózara senim men qoldaýǵa negizdelgen kelissózder júrgizdik. Yqpaldastyqtyń tyń baǵyttaryn aıqyndadyq, – dedi Qazaqstan Prezıdenti.
