Qasym-Jomart Toqaevtyń Qytaıǵa saparynyń úsh ereksheligi ataldy
«QR Prezıdenti QHR Tóraǵasy Sı Tszınpın myrzanyń shaqyrýy boıynsha 10-12 qyrkúıekte memlekettik sapar shegip, onyń barysynda birqatar ekijaqty kelissózder ótkizip qaıtty. Osy rette, QR Prezıdentiniń QHR-ǵa saparynyń úsh ereksheligin atap ótkim keledi. Birinshiden, atalǵan is-shara Memleket basshysynyń Prezıdenttik saılaýdan keıingi Qytaıǵa alǵashqy memlekettik sapary, jalpy alǵanda alǵashqy sapar boldy. Qytaı tarapy da oǵan úlken baǵa berip otyr. Ekijaqty qarym-qatynastardaǵy basymdyq bar ekendigin sezinip, olar da óz taraptarynan bizben etene jumys isteýge, birge damýǵa, halyqtarymyzdyń ıgiligi úshin birge jumys isteýge daıyn ekenin rastady», - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, bul, Nur-Sultan men Beıjiń arasyndaǵy qarym-qatynastardyń qazirgi deńgeıi jáne mańyzymen qatar onyń bolashaq traektorııasyn aıqyndaý turǵysynan erekshe basymdyqqa ıe ekendigin kórsetti.
«Óz kezeginde Prezıdent Toqaev sabaqtastyqty saqtaı otyryp, ózara baılanystar men yntymaqtastyqty tyń beleske shyǵarýǵa Qazaqstan múddeli ekenin málimdedi. Aıta ketý kerek, qytaı tarapy da buǵan úlken mán beretindigin kórdik. Olar bizben saýda-ekonomıkalyq qatynastardy, kóliktik, logıstıkalyq, óndiristik, sonymen qatar jańa baǵyttarda jumys isteýge daıyn ekendikterin rastady», - dedi Prezıdent kómekshisi.
M.Nurtileýovtiń aıtýynsha, ekinshiden, sapar dúnıejúzilik saıasat pen ekonomıkadaǵa aýmaly-tókpeli kezeńde ótip otyr.
«Bul bizdiń qatynastardyń strategııalyq sıpatqa tolyq sáıkes ekendigin taǵy da kórsetti. Sáıkesinshe, osy tusta eki el lıderleri aımaqtyq jáne halyqaralyq máseleler tóńireginde pikir almasty. Ortaq ustanymdaryn, sonymen qatar ózekti problemlalar boıynsha pozıtsııalaryn topshylady», - dedi ol.
Úshinshiden, Memleket basshysynyń kómekshisi Prezıdent sapary Qytaıdyń 70 jyldyq mereıtoıy qarsańynda uıymdastyrylǵanyna nazar aýdartty.
«Osy qadammen biz Qytaımen dostas halyq ekendigimizdi kórsettik. Tatý kórshilikti kórsettik. Ózara tıimdi yqpaldastyqty ári qaraı jan-jaqty bekite túsýge daıyndyǵymyzdy bildirdik», - dedi M.Nurtileýov.