Qasym-Jomart Toqaevtyń Qazaqstan halqyna ant berý rásimi qalaı ótip jatyr
ASTANA. QazAqparat - Respýblıka Prezıdenti ókilettigin ýaqytsha atqaratyn Qasym-Jomart Toqaevtyń Qazaqstan halqyna ant berý rásimi ótip jatyr, dep habarlaıdy QazAqparat tilshisi.
Aldymen QR Parlamenti Májilisiniń tóraǵasy Nurlan Nyǵmatýllın Q.Toqaevtyń Respýblıka Prezıdenti ókilettigin ýaqytsha atqarýǵa kirisýine arnalǵan sharanyń ashyq ekendigin jarııa etti. Osydan keıin birlesken otyrysy ótip jatqan zalǵa qurmetti qaraýyl elimizdiń týyn, Konstıtýtsııasyn ákeldi. Kelesi kezekte elimizdiń Tuńǵysh Prezıdenti - Elbasy Nursultan Nazarbaev barsha depýtattardyń qoshemetimen zalǵa kirip, joǵary orynǵa otyrdy. Osydan keıin Qasym-Jomart Toqaev zalǵa kirgen ant qabyldaıtyn tuǵyrǵa kóterildi.
Munan soń Májilis Tóraǵasy Nurlan Nyǵmatýlın QR Konstıtýtsııalyq keńesiniń tóraǵasy Qaırat Mámıge sóz berdi.
«Qurmetti depýtattar, men shaqyrylǵandar! Táýelsiz Qazaqstannyń negizin qalaýshy Qazaqstan Respýblıkasynyń Tuńǵysh Prezıdenti Elbasy Nursultan Nazarbaev óziniń konstıtýtsııalyq quqyǵyn jáne de tarıhı mıssııasyn tolyqtaı iske asyryp, Qazaqstan Prezıdenti ókilettigin óz erkimen toqtatty. Mundaı jaǵdaıda QR Konstıtýtsııasynyń 48-baby 1 tarmaǵyna sáıkes QR Prezıdentiniń ókilettigi qalǵan merzimge Senat tóraǵasy Qasym-Jomart Kemeluly Toqaevqa kóshedi. QR Konstıtýtsııasynyń 42-babyna sáıkes QR Prezıdenti Qazaqstan halqyna ant bergen sátten bastap qyzmetine kiresedi», - dep atap ótti ol.
Osydan keıin Qasym-Jomart Toqaev oń qolyn elimizdiń Ata zańyna qoıyp turyp: «Qazaqstan halqyna adal qyzmet etýge, Qazaqstan Respýblıkasynyń Konstıtýtsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin», - dedi.
Kelesi kezekte Májilis tóraǵasy QR Ortalyq Saılaý komıssııasynyń tóraǵasy Berik Imashevqa sóz berdi.
«QR Konstıtýtsııasynyń 48-babyna sáıkes, Sizge Prezıdent kýáligin, keýdege taǵatyn belgisin jáne baıraǵyn, «Altyn qyran» ordenin tapsyrýǵa ruqsat etińiz», - degen B.Imashev Qasym-Jomart Toqaevqa Prezıdent kýáligin, keýdege taǵatyn tós belgisimen jáne baıraǵyn, «Altyn qyran» ordenin tapsyrdy.
Qazirgi ýaqytta Qasym-Jomart Toqaev sóz sóıleýde.
