Qasym-Jomart Toqaevtyń qatysýymen Májilis otyrysy bastaldy

NUR-SULTAN. QazAqparat – Memleket basshysy Qasym-Jomart Toqaevtyń qatysýymen Májilis otyrysy bastaldy, dep habarlaıdy QazAqparat tilshisi.

Buǵan deıin QR Prezıdentiniń baspasóz hatshysy Berik Ýálı Memleket basshysynyń beınebaılanys arqyly Parlament Májilisiniń otyrysyna qatysyp, elimizdiń jańa Premer-Mınıstriniń kandıdatýrasyn usynatyndyǵyn habarlaǵan bolatyn. Sondaı-aq Prezıdent saıası jáne áleýmettik-ekonomıkalyq salalardaǵy ózekti máselelerdi sheshý boıynsha aýqymdy baıandama jasaıdy dep kútilýde.

Esterińizge sala keteıik, 5 qańtarda Premer-Mınıstr Asqar Mamın otstavkaǵa ótinish berip, ony Memleket basshysy qabyl alǵan bolatyn. Osydan keıin Qazaqstan Respýblıkasy Premer-Mınıstri mindetterin ýaqytsha atqarý Álıhan Ashanuly Smaıylovqa júkteldi. Al QR Úkimetiniń músheleri Úkimettiń jańa quramy bekitilgenge deıin óz mindetterin atqarýdy jalǵastyryp jatyr.