Qasym-Jomart Toqaevtyń Germanııaǵa sapary ekijaqty qarym-qatynasqa oń áserin tıgizedi
Mundaı pikirdi Ortalyq Azııadaǵy german ekonomıkasy ókildiginiń bas jobalyq menedjeri Ásel Turysbekova bildirdi, dep habarlaıdy QazAqparat tilshisi.
«Qasym-Jomart Toqaevtyń Germanııaǵa sapary ekijaqty ózara qarym-qatynas dınamıkasyna oń áserin tıgizedi. Qazaqstan óziniń Ortalyq Azııadaǵy Germanııanyń mańyzdy strategııalyq seriktesi ekendigin eske sala alady. Nemis nemese basqa eýropalyq bıznes Ortalyq Azııa naryǵyna kirgen kezde aldymen barlyq ýaqytta da Qazaqstanda ornalasyp, odan keıin belgili bir ýaqyttan soń kórshi elderdiń naryqtaryna shyǵýy tarıhı turǵyda qalyptasyp qalǵan», - dedi ol.
Onyń atap ótýinshe, dál osy jaıt eýropalyq bızneske óńirde aıaqtan nyq turýǵa múmkindik berdi.
«Bul kóptegen nemis kompanııasyna osy jerde óte jaqsy ornyǵyp qalýyna múmkindik jasady. Qazirgi ýaqytta Ózbekstanǵa qatysty óte qyzyqty ahýal qalyptasyp, shekara ashyldy. Bul elge qyzǵýshylyq artýda. Búginde nemis bıznesi Qazaqstanǵa jáne óńirge úlken qyzyǵýshylyq tanytyp otyr. Osy turǵydan alǵanda bul sapar bizdiń pozıtsııamyzdy nyǵaıtýǵa jáne jańa qatynastardy damytyp, eski baılanystarǵa qoldaý kórsetý úshin ózara yntymaqtastyqty ulǵaıtatyndyǵymyzdy aıtýǵa sep bolady», - dedi Ásel Turysbekova.
Buǵan deıin 5-6 jeltoqsanda Qazaqstan Prezıdenti Qasym-Jomart Toqaev Germanııa Federatıvtik Respýblıkasyna resmı saparmen baratyndyǵyn habarlaǵan edik.
