Qasym-Jomart Toqaevtyń barlyq shyǵyndary boıynsha esep beremiz - kandıdattyń senimdi ókili

NUR-SULTAN. QazAqparat - QR Prezıdenttigine kandıdat Qasym-Jomart Toqaevtyń senimdi ókili, respýblıkalyq qoǵamdyq shtabtyń basshysy Máýlen Áshimbaev saılaýaldy úgit-nasıxattyń shyǵyndary týraly aıtty, dep habarlaıdy QazAqparat tilshisi.

"Kúni keshe ǵana Qasym-Jomart Toqaevty resmı túrde tirkegennen keıin biz Halyq bankinde kandıdatymyzdyń ýaqytsha esepshotyn ashtyq. Barlyq saılaýaldy sharalar osy esepshot arqyly tólenedi. Oǵan el azamattary, kásipkerler men zańdy tulǵalardan aqsha túsedi dep oılaımyz. Árıne, partııa da óz kómegin jasaıdy. Bizde qajetti resýrstar men múmkindikter bar. Sonyń bárin paıdalanyp, keıbir shyǵyndardy óz moınymyzǵa alamyz. Artynan biz kandıdattyń barlyq shyǵyndary men oǵan jumsalǵan qarajat boıynsha ashyq esep beremiz", - dedi M.Áshimbaev jýrnalısterge bergen suxbatynda.

Aıta keteıik, elordada QR Prezıdenttigine kandıdat Qasym-Jomart Toqaevtyń respýblıkalyq qoǵamdyq shtaby quryldy. Budan bólek, úgit-nasıxat sharalary kezinde qalalyq, oblystyq jáne aýdandyq shtabtar jumys isteıtin bolady. Búgin "Nur Otan" partııasy Tóraǵasynyń orynbasary Máýlen Áshimbaev respýblıkalyq shtabqa kimderdiń kirgenin aıtyp berdi. Shtab áleýmettik jelilerge úlken basymdyq beretin bolady. Al saılaýaldy úgit-nasıxatqa shetel mamandary tartylmaıdy.