Qasym-Jomart Toqaevty ulttyq kompromıstiń tulǵasy deýge negiz bar - Saırov

NUR-SULTAN. QazAqparat - «Nur Otan» partııasynyń músheleri kandıdatýrasyn biraýyzdan qoldap, daýys bergen Qasym-Jomart Toqaev - ulttyq kompromıss pen áleýmettik úmittiń tulǵasy dep aıtýǵa barlyq negiz bar. Saıasattanýshy Erlan Saırov osyndaı pikir bildirdi, dep habarlaıdy QazAqparat tilshisi.

«Bul - meniń oıymsha búgingi tańda óte durys sheshim. Qasym-Jomart Kemeluly halyqaralyq deńgeıde, sonymen birge Qazaqstannyń halqyna bedeldi tulǵa. Ózderińiz biletindeı, Qasym-Jomart Toqaev BUU Bas hatshysynyń orynbasary bolyp eńbek etken. BUU - dúnıejúzindegi ekonomıkalyq, gýmanıtarlyq jáne áleýmettik máselelerdi sheshetin úlken uıym. Sonymen birge, ol elimizde Premer-Mınıstr bolyp eńbek etti. Úkimet basshysy bolyp turǵan kezinde búgingi tańdaǵy Qazaqstannyń áleýmettik-ekonomıkalyq damýynyń negizgi baǵyttary osy kisiniń tusynda aıqyndaldy. Sondyqtan, Qazaqstannyń áleýmettik-ekonomıkalyq qazirgi jaǵdaıynda bul tulǵa ulttyq kompromıss pen áleýmettik úmittiń fıgýrasy dep aıtýǵa barlyq negiz bar», - deıdi Erlan Saırov.

Eske sala ketsek, «Nur Otan» partııasynyń delegattary búgingi kezekten tys sezde Qasym-Jomart Toqaevtyń kandıdatýrasyna daýys berip, biraýyzdan qoldaǵan bolatyn.

Óz kezeginde QR Prezıdenti Qasym-Jomart Toqaev aldaǵy prezıdenttik saılaýǵa kandıdat retinde qatysatynyn málim etti.