Qasym-Jomart Toqaevqa Naýryz atty tazy kúshigi syıǵa berildi

ASTANA. QazAqparat – Memleket basshysy Qasym-Jomart Toqaevqa tazynyń kúshigi tartý etildi, dep habarlaıdy QazAqparat tilshisi.

«Sizge syılyq tartý etkimiz keledi. Ejelden qazaqy ıt tuqymy Qazaqstanda óte qundy syılyqtyń biri sanalyp kelgen edi. Ókinishke oraı, sońǵy jyldary onyń qundylyǵy tómendep bara jatyr. Siz qabyldaǵan qazaqy ıt tuqymdaryn saqtaý jáne kóbeıtý jónindegi jańa zańdy qabyldaýdyń arqasynda myna kúshik te tazy tuqymyn kóbeıtýge septigin tıgizedi dep úmittenemiz. Qujattary bar, aty – Naýryz. Ol osydan 1,5 aı buryn dúnıege keldi. Tuqymynda jalǵyz bolǵandyqtan osynaı at berýdiń nyshandyq máni boldy», - dedi Prezıdentke kúshikti syıǵa tartqan asyl tuqymdy tazy ósirýshi Anna Zaharova.

Óz kezeginde Memleket basshysy tazyny halyqaralyq deńgeıde dáripteý qajet ekenin aıtty.

«Qumaı tazy – erekshe janýar, qazaqtyń jeti qazynasynyń biri. Biz tazy men tóbetti halyqaralyq deńgeıde keńirek dáripteýimiz kerek. Syrtqy ister mınıstrligi de mindetti túrde atsalysýy qajet. Tazyǵa erekshe kútim, qamqorlyq, kásibı kózqaras qajet. Sol úshin arnaıy zań qabyldadyq», – dedi Prezıdent.

Buǵan deıin Prezıdent tazy ıtterdiń kórmesin tamashalaǵanyn jazǵan edik.