Qasym-Jomart Toqaev: Jemqorlyqpen kúresti kúsheıtý kerek
Memleket basshysynyń aıtýynsha, byltyr ártúrli deńgeıdegi 7 ákim men olardyń orynbasarlary, sondaı-aq, 14 oblystyq basqarma basshysy men olardyń orynbasarlary qylmystyq jaýapkershilikke tartylǵan. Budan bólek 2020 jyldyń qańtarynan 2021 jyldyń naýryzyna deıingi aralyqta qaramaǵyndaǵy qyzmetkerleriniń jemqorlyqqa qatysy bolǵany úshin 20 saıası qyzmetkerge qatysty shara qoldanyldy.
Qasym-Jomart Toqaev ákimderge óz aımaqtaryndaǵy sybaılas jemqorlyqty boldyrmaý úshin júıeli jumystar júrgizýdi tapsyrdy. Al jemqorlyqqa qarsy kúres qyzmeti ózderine júktelgen mindetke sergek qaraǵany jón.
«Buǵan deıin aıtqanymdaı, eger memlekettik qyzmetshi bıýdjet qarjysyn jymqyrýdy nemese para alyp baıýdy kózdemeı, sheshim qabyldaý kezinde qatelikke jol bergen bolsa, onda ol qylmystyq jaýapkershilikke tartylmaýy kerek. Áıtpese, memlekettik apparattyń berekesin ketiremiz. Sybaılas jemqorlyqqa sanaly túrde barǵan sheneýnik qylmystyq jaýapkershilikke tartylýy tıis», – dedi Prezıdent.
Eske salaıyq, búgin Aqordada Memleket basshysy Qasym-Jomart Toqaev aýyl ákimderin saılaý máseleleri jóninde keńes ótkizdi.